२६ चैत, काठमाडौं । म्यानमारमा सैन्य कू विरुद्धको प्रदर्शनमा सुरक्षाकर्मीले चलाएको गोली लागेर कम्तीमा ११ प्रदर्शनकारीको मृत्यु भएको छ । म्यानमारको उत्तरपश्चिमी सहर ताजेमा बिहीबार भएको प्रदर्शनमा निस्किएका प्रदर्शनकारीले पनि सुरक्षाकर्मीमाथि हाते बन्दुक र पेट्रोल बमले प्रहार गरेको स्थानीय सञ्चारमाध्यमहरुले उल्लेख गरेका छन् ।
प्रदर्शनकारीले पनि प्रतिकार गर्न थालेपछि थप पाँच ट्रक सुरक्षाकर्मी परिचालन गरिएको थियो । उक्त प्रदर्शनमा प्रहरीको गोली लागेर थप २० प्रदर्शनकारी घाइते भएका छन् भने सुरक्षाकर्मीतर्फ भएको क्षतिबारे केही बताइएको छैन ।
म्यानमारमा गत फेब्रुअरी १ मा सेनाले प्रजातन्त्रवादी नेताहरुलाई हटाउँदै सत्ता कब्जा गरेको थियो । त्यसयता म्यानमारमा निरन्तर सैन्य कूको विरोधमा प्रदर्शन भइरहेको छ । एसिस्टेन्स एसोसिएसन फर पोलिटिकल प्रिजनर्स (एएपीपी)का अनुसार म्यानमारमा सेनाविरुद्धको प्रदर्शनमा अहिलेसम्म ६ सयभन्दा बढी प्रदर्शनकारी मारिइसकेका छन् ।
Regime forces killed 11 people in Taze Township, Sagaing Region late on Apr. 7. Residents used homemade firearms in an attempt to prevent troops from entering the town. Troops deployed in the town on Apr. 8, threatening to shoot protesters.
Photo: CJ#WhatsHappeningInMyanmar pic.twitter.com/UwORs3eAbX— The Irrawaddy (Eng) (@IrrawaddyNews) April 8, 2021
यसअघि बुधबार पनि म्यानमारमा १२ प्रदर्शनकारी मारिएका थिए । एएपीपीकाअनुसार सुरक्षाकर्मीले प्रदर्शनकारीमाथि गोली, ग्रिनेड र मेसिनगनको प्रयोग गरिरहेका छन् ।
म्यानमारको प्रदर्शनमा सहभागीहरुले अब नागरिकले आफ्नो सुरक्षा आफैंले गर्ने प्रयास गर्न थालेको बताएका छन् । एएपीपीका अनुसार अहिलेसम्म दुई हजार ८४७ जना प्रदर्शनकारी पक्राउ परिसकेका छन् ।
एजेन्सीहरुको सहयोगमा
