Comments Add Comment

कहाँ पुगे मोरङ छिरेका भनिएका रोहिंग्या ?

काठमाडौंको राममन्दिर क्षेत्रमा रोहिंग्या शरणार्थी शिविर । फाइल फोटो

१८ वैशाख, विराटनगर । म्यानमारको सेनाबाट लखेटिएपछि बंगलादेशमा बस्दै आएका रोहिंग्या शरणार्थीको एउटा समूह झापा र मोरङ छिरेको छ । खुला सीमाको फाइदा उठाउँदै एजेन्ट मार्फत मोरङमा ६ र झापामा १०–१२ जनाको समूह छिरेको सुरक्षा सम्बद्ध अधिकारीहरु बताउँछन् ।

भारतबाट लुकिपिछी झापा र मोरङ छिरेकाहरुको प्रशासनले खोजी गरिरहेको छ । तर उनीहरु भेटिएका छैनन् । स्रोतका अनुसार झापाको काँकडभिट्टाबाट छिरेको समूह झापाको कमल गाउँपालिकासम्म पुगेको देखिन्छ । त्यसयता भने भेटिएका छैनन् ।

६ जनाको दुई परिवार विराटनगर छिरेको थियो । चोर बाटो हुँदै भित्रिएको जानकारी पाए पनि विराटनगर आएका ६ जनाको परिवार सम्पर्कमा छैनन् । झापा र मोरङबाट दुई वटा समूह कोरोना महामारीको दोस्रो लहर सुरु भएकै अवस्थामा नेपाल भित्रिएको थियो ।

बंगलादेशमा कष्टकर रुपमा गुजारा गरिरहेका शरणार्थी सुरक्षित बसोबासको खोजीमा नेपाल छिरेको स्रोतको दाबी छ । गृह मन्त्रालय स्रोतका अनुसार रोहिंग्या मुस्लिमहरु झापाको काँकडभिट्टा र मोरङको सीमावर्ती नाका हुँदै नेपाल छिरेका हुन् ।

मन्त्रालयले नेपाल छिरेका रोहिंग्या शरणार्थीको अवस्था बुझ्न जिल्ला प्रशासन कार्यालयहरुलाई निर्देशन दिएको छ । मन्त्रालयले वैशाख ६ गते झापा मोरङ र काठमाडौं प्रशासनलाई निर्देशन दिएको हो । काठमाडौंमा रोहिग्याको दुई वटा शिविर छ ।

यो पनि पढ्नुहोस रोहिंग्या ट्रेल : म्यानमारदेखि काठमाडौंसम्म

भारतबाट चोर बाटो हुँदै नेपाल प्रवेश गरेका करिब पाँच सय रोहिंग्या काठमाडौंको बुढानीलकण्ठ नगरपालिकाको राममन्दिर क्षेत्रमा क्याम्प बनाएर बसेका छन् । राममन्दिर क्षेत्रस्थित रोहिंग्या आप्रवासी क्याम्पमा बस्नेहरुले नै उनीहरुलाई नेपाल भित्र्याएको स्रोतको दाबी छ । स्रोतका अनुसार उनीहरुले बंगलादेश र भारतभन्दा तुलनात्मक रुपमा नेपालमा जीवन सहज हुने भन्दै प्रतिव्यक्ति ४० हजार रुपैयाँसम्म लिएर नाका कटाएका छन् ।

मोरङका प्रमुख जिल्ला अधिकारी कोषहरि निरौलाले रोहिंग्या विराटनगर प्रवेश गरेको सूचना आएपनि प्रवेश गरेको कुनै प्रमाण नभेटिएको बताए । सूचना आएपछि खोजी गरेको बताउँदै उनले विराटनगर प्रवेश गरेको भेटिए नियन्त्रणमा लिइने बताए । उनले सीमा क्षेत्रमा निगरानी पनि बढाइएको बताए ।

म्यानमार सेनाले आक्रमण गर्न थालेपछि तीन वर्ष अघि थातथलो छाडेर भागेका रोहिग्याको ठूलो समूह बंगलादेशमा छ । हिंसात्मक गतिविधिका कारण मुलुक छाड्न बाध्य भएको म्यानमारको अल्पसंख्यक रोहिंग्या समुदाय बंगलादेशबाट विभिन्न देशमा पुगेको छ ।

यो खबर पढेर तपाईलाई कस्तो महसुस भयो ?

ट्रेन्डिङ

१०

खच्चड जिन्दगी !

Advertisment