नेपाली म्यूजिक भिडियो बजारमा नायक तथा मोडल नाजिर हुसेनको सर्वाधिक चर्चा छ । उनले, थुप्रै हिट गीतका भिडियोमा अभिनय गरेका छन् । म्यूजिक भिडियोमा अभिनय गरेको १ लाखसम्म पारिश्रमिक वुझ्ने नाजिर चलचित्रको पर्दामा भने कमै देखिन्छन् । यसैले, पनि उनको चलचित्रमा क्रेज कमजोर बनेको विश्लेषण हुने गरेको छ ।
तर, नाजिरले ३ वटा चलचित्र साइन गरेका छन् । ती तिनै वटा चलचित्रको छायांकन सुरु हुन नसक्दा नाजिरको चलचित्रमा खासै काम नभएको जस्तो देखिएको छ ।
नाजिरले अभिनय गर्न लागेको चलचित्र ‘तिमीसँग हुने मन छ’को छायांकन वैशाखको पहिलो साताबाट सुरु गर्ने तयारी गरिएको थियो । तर, नेपालमा कोरोना संक्रमितहरुको संख्या बढेपछि यो चलचित्रको काम सुरु हुन सकेन । दिवाकर भट्टराइले निर्देशन गर्न लागेको यो चलचित्रमा नाजिरले नायिका दीपिका प्रसाइसँग काम गर्दैछन् ।
नाजिरले पहिलो लकडाउन लगतै चलचित्र ‘चिलगाडी’ पनि साइन गरेका थिए । तर, यो चलचित्रको काम यसपछि अगाडि बढेको छैन । चलचित्रको सम्पूर्ण टिम फाइनल नभएकाले पनि यो चलचित्रको काम अगाडि बढ्न नसकेको हो ।
नाजिरले चलचित्र ‘हुतुतु’ पनि साइन गरेका छन् । यो चलचित्रलाई निर्माता सन्तोष सेनले निर्माण गर्दैछन् । तर, यो चलचित्रको काम पनि कहिलेबाट सुरु हुन्छ पक्का छैन ।
यसरीहेर्दा, नाजिरले काम गर्न लागेका चलचित्रको छायांकन अगाडि बढ्ने हो भने उनी चलचित्रको पर्दामा पनि व्यस्त हुने पक्का छ । तर, कोरोना कहरले सबैभन्दा बढी प्रभावित भएको चलचित्र क्षेत्र कहिलेबाट पुरानै अवस्थामा फर्किने हो भन्न सकिने अवस्था छैन ।
यस्तोमा नाजिरले अझै केही समय म्यूजिक भिडियोमार्फत नै दर्शकमाझ आफ्नो अभिनय देखाउनुपर्नेछ ।
