तस्वीरमा हेर्नुस् भारतको हवाई आक्रमणपछिको स्थिति

भारतको हवाई आक्रमणपछि जम्मु कश्मिरको एक जिल्ला पुंछमा देखिएको दृश्य । तस्वीरः पुनित परांजपे, एएफपी

२४ वैशाख, काठमाडौं । भारतले गएराति पाकिस्तान प्रशासित कश्मिर र पाकिस्तानका विभिन्न क्षेत्रमा गरेको हवाई आक्रमणमा परेर कम्तिमा ३० जना मारिएका छन् । कयौं घाइते भएका छन् ।

भारतले दुई साताअघि एक नेपालीसहित २६ जना भारतीय नागरिकको जम्मु कश्मिरको वैसरण उपत्यकामा भएको आतंकवादी हमलाको ‘जवाफी कारबाही’ गरिएको भनेको छ । भारतीय सेनाले ‘न्याय दिइएको’ भन्दै संक्षिप्त प्रतिक्रिया दिएको छ ।

भारतको रक्षा मन्त्रालयले विज्ञप्ति जारी गर्दै भनेको छ, ‘भारतीय सैन्य बलहरुले पाकिस्तान र पाकिस्तान प्रशासित कश्मिरमा आतंकवादी संरचनाहरुलाई लक्षित गरेर अपरेशन सिन्दुर चलाएका छन्, जहाँबाट भारतविरुद्ध आतंकवादी हमलाको योजना बनाइएको थियो र निर्देशन दिइएको थियो ।’

तर, पाकिस्तानका प्रधानमन्त्री शहवाज सरिफले ‘कायरतापूर्ण आक्रमण’ भन्दै जवाफ दिइने बताएका छन् । यसपछि दुई देशबीच तनावको स्थिति सिर्जना भएको छ ।

तस्वीरहरुमा हेर्नुस् मध्यराति हमलापछि सिर्जित परिस्थितिः

पाकिस्तानका सुरक्षाकर्मीहरुले लाहोरबाट करिब ३० किलोमिटर टाढा पर्ने मुरिद्केमा रहेको सरकारी स्वास्थ्य तथा शैक्षिक परिसरको भत्किएको भवनको निरीक्षण गरिरहेका छन्। तस्वीरः मुर्तज अली, एएफपी

सुरक्षाकर्मीहरूले पाकिस्तान प्रशासित कश्मीरको राजधानी मुजफ्फराबादमा मे ७, २०२५ मा भएको एक आक्रमणस्थल नजिकको सडक घेराबन्दी गरेका छन्, जबकि स्थानीय बासिन्दाहरू आफ्नो घर खाली गरिरहेका छन्। तस्वीरः सज्जाद कय्यूम, एएफपी

मानिसहरूले २०२५ मे ७ मा भारतीय प्रशासन अन्तर्गतको कश्मीरको मुख्य सहर श्रीनगर नजिक वुयानमा विमानको टुक्रा भेटेका छन्। पाकिस्तानी अधिकारीहरुले भारतका केही लडाकु विमानहरु खसाएको बताएका छन् । तर, त्यो टुक्रा के हो भन्ने स्पष्ट भइसकेको छैन । तस्वीरः तौसीफ मुस्तफा, एएफपी