१० साउन काठमाडौं । नेपाली कांग्रेसका वरिष्ठ नेता रामचन्द्र पौडेल समूहले तोकिएकै मितिमा केन्द्रीय महाधिवेशन गर्नुपर्नेमा जोड दिएको छ ।
स्थानीय अधिवेशनको कार्यतालिका प्रभावित भएपछि कांग्रेसको आसन्न महाधिवेशन अन्यौलमा परेका बेला पौडेल समूहले केन्द्रीय महाधिवेशन निर्धारित समयमै हुनुपर्नेमा जोड दिएको हो ।
पौडेल समूहको आइतबार बसेको बैठकमा महाधिवेशनका बारेमा छलफल भएको नेता अर्जुननरसिंह केसीले जानकारी दिए । हामीबीच मुख्यत आसन्न महाधिवेशनकै बारेमा छलफल भयो । महाधिवेशन समयमा हुँदैन कि भन्ने आशंका उत्पन्न भएको छ,’ उनले अनलाइनखबरसँग भने, ‘तर हामीले चाहिँ तोकिएकै समयमा महाधिवेशन हुनुपर्छ भन्ने निष्कर्ष निकालेका छौं ।’
उनले क्रियाशील सदस्यताका कारण महाधिवेशन प्रभावित हुने अवस्था आएपनि अब स्थानीय अधिवेशन पनि चाँडै हुनुपर्ने बताए ।
‘क्रियाशील सदस्यताको काम छिटो सम्पन्न गर्नुपर्दछ र अब स्थगित भएका स्थानीय अधिवेशनको मिति पनि चाँडो तोकेर अगाडि बढ्नुपर्दछ,’ नेता केसीले भने, ‘भदौमा महाधिवेशन गर्नैपर्ने संवैधानिक बाध्यता हामीलाई छ । महाधिवेशन कुनै पनि बहानामा सार्ने काम गर्नुहुन्न ।’
कांग्रेस महाधिवेशन भदौ १६–१९ मा काठमाडौंमा गर्ने गरी कार्यतालिका सार्वजनिक भइसकेको छ । तर क्रियाशील सदस्यताको काम सम्पन्न नहुँदा महाधिवेशन प्रभावित हुने आशंका छ ।
