१३ साउन, काठमाडौं । नर्भिक अस्पतालले लुम्बिनी प्रदेशकी उद्योग वन तथा वातावरण मन्त्री कल्पना पाण्डे खतरामुक्त रहेको जनाएको छ ।
अस्पतालका जनसम्पर्क अधिकृत सोमनाथ बास्तोलाका अनुसार मन्त्री पाण्डेको स्वास्थ्यमा सुधार आएपछि आईसीयू कक्षबाट बुधबार बिहान एनआइसीयूमा सारिएको छ ।
न्युरोसम्बन्धी रोग जिबीएस (गुइलिन–बारे सिन्ड्रोम)बाट गम्भीर बिरामी भएकी मन्त्री पाण्डे गत आइतबारदेखि अस्पतालको आईसीयू कक्षमा उपचाररत थिइन् ।
यो पनि पढ्नुहोस
जानसेन खोपमा गुइलिन–बारे सिन्ड्रोमको जोखिम कति ?
जनसम्पर्क अधिकृत बास्तोलाले अनलाइनखबरसँग भने, ‘उहाँको स्वास्थ्य अवस्था खतरामुक्त छ। आजै बिहानदेखि उहाँलाई एनआइसीयूमा राखेर उपचार गराइरहेका छौं ।’
आइतबारदेखि दुवै खुट्टा नचल्ने भएपछि मन्त्री पाण्डेलाई रुपन्देहीको भैरहवामा रहेको भीम अस्पतालबाट बुटवलको गौतमबुद्ध सामुदायिक मुटु अस्पताल हुँदै थप उपचारका लागि नर्भिक अस्पतालमा ल्याइएको थियो । उनलाई न्युरोनसम्बन्धी रोग जिडिएस भएको चिकित्सकहरुले बताएका छन् ।
मन्त्री पाण्डेलाई चिकित्सक पंकज जलान र यादव भट्टको टीमले उपचार गरिरहेको अस्पतालले जनाएको छ । चिकित्सकका अनुसार कोभिड(१९ को खोप लगाएपछि उनीमा यस्तो समस्या देखिएको थियो ।
