जाजरकोटमा देउता नुहाउन चाँदे हिमाल गएका एक जनाको मृत्यु

१ असोज, सुर्खेत । जाजरकोटको चाँदे हिमालमा देउता नुहाउन गएका एक जनाको मृत्यु भएको छ । जुनीचाँदे गाउँपालिका–१, काप्राका ५९ वर्षीय अविमान रावतको मृत्यु भएको जिल्ला प्रहरी कार्यालय जाजरकोटका डीएसपी मधुकुमार थापाले जानकारी दिए ।

चाँदे हिमालको चौरीपाटनमा रहेको नदाई डावमा नारायण देउता नुहाउन जाने क्रममा लगातारको वर्षासँगै आएको हावाहुरीमा परेर रावको निधन भएको हो । यस्तै अर्का एकजना घाइते भएको प्रहरीले जनाएको छ ।

डीएसपी थापाका अनुसार उनीहरु बुधबार गाउँबाट देउता नुहाउनका लागि चौरीपाटनको नदाई डाव हिँडेका थिए । २५ जनामध्ये शुक्रबार बिहान रावतको मृत्यु भएको र अन्य २४ जना सम्पर्कमा आएको प्रहरीले जनाएको छ ।

पूर्णिमाको पाँच दिन अगाडि चाँदे हिमाल पुगेर नुहाएर देउता ल्याउने प्रचलन रहेको छ ।