कांग्रेस महामन्त्रीमा विश्वप्रकाश शर्मा पनि निर्वाचित

१ पुस, काठमाडौं । नेपाली कांग्रेसको महामन्त्रीमा गगन थापासँगै विश्वप्रकाश शर्मा पनि निर्वाचित भएका छन् ।

महामन्त्री पदमा गगन थापापछि दोस्रो धेरै मत ल्याएर उनी महामन्त्रीमा निर्वाचित भएको निर्वाचन समितिले जनाएको छ ।

समितिका अनुसार विश्‍वप्रकाश शर्माले १९८४ मत ल्याएका छन् । यस्तै प्रकाशशरण महतले १५५६, प्रदीप पौडेलले १३९३, डा. मिनेन्द्र रिजालले ८०९ र राजाराम कार्कीले १०६ मत पाएको निर्वाचन समितिले जनाएको छ ।

१४औं महाधिवेशनमा गगन थापा र मिनेन्द्र रिजाल शेखरको प्यानलबाट र विश्वप्रकाश शर्मा र प्रकाशमान सिंह प्यानलबाट उम्मेदवार बनेका थिए । यस्तै प्रकाशशरण महत र प्रदीप पौडेल देउवा प्‍यानलबाट र राजा राम कार्की विमलेन्द्र निधि प्‍यानलबाट उम्‍मेदवारी दिएका थिए ।

कांग्रेसको १४औं महाधिवेशन अन्तर्गत सभापति, उपसभापति र महामन्त्री पदको नतिजा सार्वजनिक भइसकेको छ भने अब सह-महामन्त्री पदको मतगणना शुरू भइसकेको छ।