२७ माघ, काठमाडौं । नेपालको मछिन्द्र फुटबल क्लबले एएफसी कपको प्रारम्भिक चरणको खेल आगामी चैतमा घरेलु मैदानमा खेल्ने भएको छ ।
मछिन्द्रले एएफसी कपको पहिलो चरणको खेल आगामी अप्रिल ५ (चैत २२ गते) मा दशरथ रंगशालामा श्रीलंकाली टोली ब्लुस्टारसँग खेल्ने तय भएको अखिल नेपाल फुटबल संघ (एन्फा) ले जनाएको छ । यो खेल साँझ ५ बजे खेलाइनेछ ।
मछिन्द्रले अहिले भइरहेको ए डिभिजन लिगमा सातौं चरणको खेल सकिँदा शीर्षस्थानमा रहँदै एएफसी कपको प्रारम्भिक चरणमा स्थान बनाएको हो ।
लिगको साविक विजेतासमेत रहेको मछिन्द्रले पहिलो पटक एएफसी कप छनोट खेल्न लागेको हो । यदि मछिन्द्रले पहिलो खेलमा ब्लुस्टारलाई पराजित गरे दोस्रो चरणमा भारतको एटिके मोहन बगानसँग अप्रिल १२ मा कोलकतामा खेल्नेछ ।
मछिन्द्रले एएफसी कपको समूह चरणमा स्थान बनाउन यी दुई चरणको खेलसहित प्लेअफको अन्तिम खेल पनि जित्नुपर्नेछ ।
एएफसी कपको समूह डी मा दक्षिण एसियाली देशका टिमहरू भारतको गोकुलम केरा, बंगलादेशको बसुन्धरा किंग्स र माल्दिभ्सको माजिया एण्ड स्पोर्ट्स रिक्रिएसन छन् ।
प्रतिक्रिया 4