ए डिभिजन लिग : उपाधिमा मछिन्द्रको एक्लो दाबेदारी, रेलिगेसन होड रोमाञ्चक

२ फागुन, काठमाडौं । झण्डै एक महिनाको ब्रेकपछि फेरि सुरु भएको शहीद स्मारक ए डिभिजन लिग फुटबलको दशौं चरणको खेलहरू आइतबार सकिएपछि उपाधि होडमा मछिन्द्र एफसी एक्लो दाबेदारको रुपमा देखा परेको छ ।

साविक विजेता मछिन्द्रले तीन चरणको खेल बाँकी हुँदा दोस्रो स्थानको मनाङमाथि ६ अंकको अग्रता कायम गरेको छ भने हेड टु हेडमा पनि मछिन्द्र नै अघि छ ।

अर्कोतर्फ पुछारको फ्रेण्ड्स क्लबले सिजनको पहिलो जित निकाल्दै कम्तीमा पनि एक चरणका लागि रेलिगेसन क्षेत्र छाड्न सफल भएको छ । यसले फ्रेण्ड्सलाई ठूलो राहत मिलेको छ भने रेलिगेसन ब्याटल झन् रोमाञ्चक बनाएको छ । फ्रेण्ड्ससँग हारेको ब्रिगेड ब्वाइज र च्यासल युथ क्लब अहिले रेलिगेसन जोनमा छन् ।

दशौं चरणको खेलपछि साविक विजेता मछिन्द्रसँगै साविक उपविजेता त्रिभुवन आर्मी एफसीले अपराजित यात्रा कायम राखेको छ ।

मछिन्द्रको दाबेदारी

मछिन्द्र ८ जित र २ बराबरीपछि २६ अंक जोडेर शीर्ष स्थानमा छ । मनाङ भने २० अंक जोडेर दोस्रो स्थानमा छ ।

दशौं चरणमा विमल घर्ती मगर चम्किएपछि मछिन्द्रले च्यासल युथ क्लालई २-० ले हरायो । मनिष डाँगीको चोटले यो खेलको नतिजालाई नै छायामा पार्‍यो । केट्या यानिकसँग ठोक्किएर मैदानमा लडेका मनिषले ६ मिनेटपछि होस आएको थियो ।

मछिन्द्रका गोलकिपर विशाल श्रेष्ठले भने लिगमा लगातार ९ खेलमा क्लिनसिट राखे । उनले गोल नखाएको समय ८४६ मिनेट पुगिसकेको छ ।

मछिन्द्रसँग पराजित च्यासल भने जम्मा पाँच अंक जोडेर लिगको पुछारमा छ र रेलिगेसनको दबाबमा छ ।

दोस्रो स्थानको मनाङ थ्रीस्टारसँग बराबरीमा रोकिंदा मछिन्द्रलाई फाइदा पुगेको हो । मछिन्द्रले अब सातदोबाटो युथ क्लब, थ्रीस्टार एपीएफसँग खेल्न बाँकी छ । तीनमध्ये एक जितले पनि मछिन्द्रलाई उपाधि रक्षा गर्न पर्याप्त हुनेछ । मनाङले अब एपीएफ, एनआरटी र आर्मीसँग खेल्न बाँकी छ ।

उपाधि होडमा मछिन्द्र एक्लो दाबेदारकै रुपमा अघि देखिएको छ । तेस्रो स्थानको आर्मी पनि जावालखेलसँग बराबरी खेलेपछि मछिन्द्रलाई चुनौती दिने क्लब कमजोर बने ।

अब ११औं चरणमै लिग च्याम्पियनको टुङ्गो लाग्न सक्नेछ । बुधबार हुने खेलमा नवप्रवेशी सातदोबाटोलाई हराएमा मछिन्द्रले दुई खेल अगावै लिग उपाधि पक्का गर्नेछ ।

रोमाञ्चक रेलिगेसन ब्याटल

उपाधि होडमा धेरै प्रतिस्पर्धा नभए पनि रेलिगेसन ब्याटल भने रोमाञ्चक बन्दै गएको छ । यस पटक दुई टिम रेलिगेसनमा पर्ने भएकोले पनि अझ रोमाञ्चक बनेको हो ।

लिगकै सर्वाधिक गोल भएको खेलमा फ्रेण्ड्सले ब्रिगेडलाई ५-२ ले पराजित गर्दै सिजनको पहिलो जित निकाल्यो । यो जित कति महत्वपूर्ण रह्यो भने फ्रेण्ड्सले एकै जितपछि ब्रिगेडलाई र च्यासललाई पछि पार्दै रेलिगेसन जोन छाड्यो । समान ६ अंक भए पनि ब्रिगेडसँग फ्रेण्ड्स हेड टु हेडमै अघि छ ।

तालिका फ्रेण्ड्स, ब्रिगेड र च्यासल अन्तिम तीन स्थानमा छ । त्यो भन्दा अघि रहेको जावलाखेल ९ अंकसहित ११औं स्थानमा छ । जावलाखेल रेलिगेसन जोनबाट तीन अंक मात्र माथि छ । त्यसअघि एपीएफ ११ अंकसहित नवौं र नेपाल पुलिस १० अंकसहित १०औं स्थानमा छन् ।

अब हुने खेलबाट रेलिगेसन ब्याटल कस्तो हुन्छ थाहा हुनेछ । अब फ्रेण्ड्सले जावालखेलसँग खेल्नेछ भने ब्रिगेड र च्यासलबीच खेल हुनेछ । त्यसपछि फ्रेण्ड्स च्यासलबीचको खेल १२औं चरणमा हुनेछ । यो तीन खेल नै रेलिगेसनका लागि निर्णायक बन्न सक्छ ।

पहिलो जितपछि फ्रेण्ड्सका प्रशिक्षक मृगेन्द्र मिश्रले अब रेलिगेसनबाट बच्न अब २ खेल जित्नै पर्ने बताएका थिए । फ्रेण्ड्सको अन्तिम चरणको खेल हिमालयन शेर्पासँग छ ।

संकटासँग पछिल्लो खेल बराबरी भएपछि एपीएफका प्रशिक्षक कुमार थापाले पनि रेलिगेसनको चिन्ता नटरेको प्रतिक्रिया दिएका थिए ।

एपीएफको ११ अंक रहे पनि अब खेल्न बाँकी रहेको टिम बलियो रहेकोले पनि चिन्ता देखिएको हुन सक्छ । एपीएफले अब मनाङ, पुलिस र मछिन्द्रसँग खेल्न बाँकी छ । १० अंक मात्र रहेको पुलिसले पनि एपीएफबाहेक थ्रीस्टार र एनआरटीसँग खेल्न बाँकी छ ।

अब लिगमा छिटो-छिटो खेल हुने भएकोले पनि नतिजालाई असर गर्न सक्छ । दशौं चरणपछि क्लबहरूलाई एक दिनको मात्र ब्रेक हुनेछ । मंगलबारदेखि नै ११औं चरणका खेल सुरु हुनेछ ।

गोल्डेन बुट होडमा २ खेलाडी

उपाधि र रेलिगेसन बाहेक यस सिजन अर्को एउटा अवार्डका लागि प्रतिस्पर्धा तीव्र छ । त्यो टिम नभएको व्यक्तिगत अवार्डका लागि हो । यस पटक अखिल नेपाल फुटबल संघ एन्फाले सर्वाधिक गोलकर्तालाई पनि नगद पुरस्कारसहित ‘हाइएस्ट स्कोरर’को अवार्ड दिँदैछ ।

त्यसमा दुई खेलाडी संयुक्त रुपमा शीर्ष स्थानमा छ ।

मछिन्द्रका सुनिल बलले च्यासलविरुद्धको गोलपछि सर्वाधिक ६ गोल गर्नेमा आफूलाई पनि सामेल गराएका छन् । मनाङका ओलावाले आफिजले पनि ६ गोल गरेका छन् ।

लिगको सुरुवातदेखि नै सुनिलले मछिन्द्रको लागि निर्णायक गोल गर्दै आएका छन् ।

यस्तै सर्वाधिक गोलकर्ताको होडमा सातदोबाटोमा अजयी मार्टिन्स पनि छन् । मार्टिन्सको नाममा ५ गोल छ ।

यस सिजन दुई ह्याट्रिक भएको थियो । र ती ह्याट्रिक गर्ने खेलाडी पनि ओलावाले र मार्टिन्स नै हुन् ।

अब तीन खेल मात्र बाँकी रहँदा यी तीन खेलाडीलाई गोल थप्दै सर्वाधिक गोलकर्ता बन्ने अवसर छ ।

दशौं चरणको खेलको नतिजा

फ्रेण्ड्स क्लब ५-२ ब्रिगेड ब्वाइज क्लब

त्रिभुवन आर्मी एफसी १-१ जावलाखेल युथ क्लब

मछिन्द्र एफसी २-० च्यासल युथ क्लब

मनाङ मर्स्याङ्दी क्लब १-१ थ्रीस्टार

नेपाल पुलिस क्लब ०-१ सातदोबाटो युथ क्लब