वीरगञ्जमा जारी महिला गोल्डकपमा नरकटियागञ्ज विजयी

७ चैत, वीरगञ्ज । वीरगञ्ज महिला गोल्डकप फुटबल प्रतियोगिता २०७८ अन्र्तगत आज भएको खेलमा भारत बिहारको नरकटियागञ्जको टिम विजयी भएको छ ।

बाराको निजगढ फुटबल क्लबलाई ५-१ को फराकिलो गोल अन्तरले पराजित गर्दै नरकटियागञ्ज विजयी भएको हो ।

नारायणी रंगशालामा जारी खेलमा आज निजगढ एकेडेमीकी जसोदा लिम्बु बेष्ट गोल किपर, नगरकटिगञ्जकी गोल्डी कुमारी बेष्ट डिफेन्स, निजगढकी समिक्षा मगरवेष्ट मिड फिल्डर र नरकटियागंजकी लक्की कुमारी वेष्ट फरवार्ड घोषित भएका छन् ।

हरेक दिन ४ जना वेष्ट खेलाडीहरुलाई १÷१ हजार रुपैयाँ पुरस्कार दिने गरिएको आयोजक वीरगञ्ज युथ एकेडेमीका सल्लाहाकार हेमन्त चौरसियाले जानकारी दिए ।
बेष्ट खेलाडीहरुलाई सोमबार वीरगञ्ज महानगरपालिका वडा न ४ का वडा अध्यक्ष जगत साह कानु लगायतले पुरस्कार वितरण गरेका थिए ।

चैत १ गतेदेखि जारी प्रतियोगितामा पर्सा, बारा, सर्लाही, मकवानपुर र बिहारका गरी ८ वटा टिम सहभागी छन् । प्रतियोगितामा भोलिदेखि सेमिफाईनल चरणको खेल हुँदैछ ।

भोलि हुने पहिलो सेमिफाईनल खेलमा वीरगञ्ज युथ एकेडेमी पर्सा र बागमती गाउँपालिका-४ फापरबारी भिड्दैछन् ।

प्रतियोगितामा प्रथम हुनेलाई नगद ३० हजार र द्वितिय हुने समूहलाई १५ हजार रुपैयाँ पुरस्कार दिईने गोल्डकप संयोजक ऋतु शाक्यले जानकारी दिए ।