११ चैत, काठमाडौं । आसन्न स्थानीय तहको निर्वाचनमा काठमाडौं जिल्लाका पालिकामा युवा पुस्ताका कांग्रेस नेताहरुले मेयरको दाबी गरेका छन् ।
काठमाडौंमा महानगरमा काठमाडौंसहित टोखा, तारेकश्वर, कागेश्वरी मनहरा, कीर्तिपुर, गोकर्णेश्वर, चन्द्रागिरि, दक्षिणकाली, नागार्जुन, बूढानीलकण्ठ र शंकरापुर नगर ११ स्थानीय तह छन् ।
आसन्न स्थानीय तहका निर्वाचनमा काठमाडौंका पालिकाबाट मेयर उम्मेदवारका आकांक्षी पार्टीमा फरक फरक समूह निकट छन् । कतिपयले भने समूह नभई केन्द्रीय नेताको पक्षधरता लिएर उम्मेदवार बन्न खोजेका छन् ।
टोखामा ३२ वर्षीया रजनीको दाबी
टोखा नगरपालिकामा ३२ वर्षीया रजनी थापाले मेयरको दाबी गरेकी छन् । २०७४ मा टोखा नगरपालिकामा उपमेयरमा झिनो मतले उनी पराजित भएकी थिइन् । एमालेबाट उपप्रमुखमा विजयी ज्ञानमाया डंगोलले ८ हजार ९८ मत ल्याउँदा थापाले ८ हजार ३६ मत प्राप्त गरेकी थिइन् ।
‘उपमेयरमा म झिनो मतले पराजित भएकी हुँ । यसपटक मेरो दाबी मेयरमा स्वाभाविक रहन्छ,’ थापाले अनलाइनखबरसँग भनिन्, ‘उम्मेदवारको नाम सिफारिस गर्न पार्टीले परिपत्र गरेपछि मैले दाबी गर्छु ।’ कांग्रेसको क्षेत्रीय सचिव रहेकी थापा व्यवसायीसमेत हुन् ।
टोखामा गत निर्वाचनमा प्रमुख र उपप्रमुख दुबै एमालेले जितेको थियो । प्रमुखमा एमालेबाट प्रकाश अधिकारीले ८ हजार ८९५ मत ल्याएका थिए । पराजित कांग्रेस उम्मेदवार हरिहर अधिकारीले ७ हजार ५१४ मत सहित पराजय भोगे ।
तारकेश्वरमा कृष्णहरि र इन्द्रमान
तारकेश्वर नगरपालिकाको मेयरमा कांग्रेसबाट उम्मेदवारमा ४० वर्षीय कृष्णहरि महर्जनको दाबी छ । उनी तारकेश्वर नगरको कांग्रेस सभापति समेत हुन् ।
‘तारकेश्वरमा नेपाली कांग्रेसलाई जिताउने अभियानमा छु । उठ्नको लागि सबैले मेरो मूल्यांकन गरेर नै अघि बढ भन्नुभएको छ,’ महर्जनले भने ।
कांग्रेस नेता भीमसेनदास प्रधान निकट उनी नेपाल च्याम्बर अफ कमर्स काठमाडौंको महासचिव हुन् ।
तारकेश्वर नगरपालिकामा युवा पुस्ताबाटै इन्द्रमान महर्जन पनि आकांक्षी छन् । उनी महासमिति सदस्य हुन् ।
तारकेश्वरमा गत निर्वाचनमा एमालेबाट मेयरमा रामेश्वर बोहरा विजयी भएका थिए । विजयी भएका बोहराले ९ हजार ३२६ मत ल्याएका थिए भने पराजित कांग्रेस उम्मेदवार श्रीराम थापाले ७ हजार ७५७ मत प्राप्त गरेका थिए ।
उपप्रमुखमा पनि एमालेले जितेको थियो । एमालेबाट भवानी डोटेल धिताल १० हजार ३३७ मत सहित विजयी हुँदा कांग्रेस दोस्रो स्थानको मत ल्याई पराजित भएको थियो । कांग्रेसबाट गीता न्यौपोने अर्यालले ६ हजार ९८३ मत ल्याएकी थिइन् ।
कागेश्वरी मनहरामा कार्कीको दाबी
कागेश्वरी मनहराको मेयरमा उपेन्द्र कार्कीको दाबी छ । काठमाडौं कांग्रेसको जिल्ला सभापतिमा पराजित कार्की गत स्थानीय तहको निर्वाचनमा पनि सोही स्थानबाट हार व्यहोरेका थिए ।
उनी प्रतिनिधिसभाका लागि सांसद लड्न चाहन्थे । तर सत्ता गठबन्धनबीच तालमेल हुँदा संघको टिकट प्राप्त हुन नसक्ने आँकलन गरी उनी नगरपालिकाको मेयरमा उठ्ने तयारीमा छन् ।
कागेश्वरी मनहरा काठमाडौं–२ मा पर्दछ । एकीकृत समाजवादीका अध्यक्ष माधवकुमार नेपाल यही क्षेत्रबाट विगतमा विजयी हुँदै आएका छन् । संघीय निर्वाचनमा तालमेल हुने अवस्था बन्यो भने कांग्रेसले यो क्षेत्र छोड्नुपर्ने हुनसक्छ । भविश्यको परिस्थिति आँकलन गरेर नै मेयरमा उम्मेदवारी दिने उनले बताए ।
‘काठमाडौं–२ बाट संघका लागि कांग्रेसबाट उम्मेदवारको टिकट पाउनुपर्ने मैले नै हो । तालमेल भयो भने माधवकुमार नेपाललाई यो क्षेत्र छोड्नुपर्दछ,’ कार्कीले भने, ‘त्यसैले म स्थानीय तहमै उठ्छु ।’ कार्की सभापति शेरबहादुर देउवा पक्षधर हुन् ।
गत निर्वाचनमा एमालेबाट यस नगरपालिकाको मेयरमा कृष्णहरि थापा विजयी भएका थिए । उनले ८ हजार ९६९ मत ल्याई जीत निकाल्दा कांग्रेसबाट पराजित कार्कीले ८ हजार ४८७ मत ल्याएका थिए । उपप्रमुख समेत एमालेकै उम्मेदवार विजयी भएकी थिइन् । विन्दु पुडासैनीले एमालेबाट उपप्रमुखमा ९ हजार १८२ मत ल्याउँदा कांग्रेसबाट पराजित उम्मेदवार अनिता अधिकारी थापाले ८ हजार २९६ मत ल्याएकी थिइन् ।
महानगरमा पनि छन् दाबी गर्ने युवा
कांग्रेस महानगरको सचिव सुशन वैद्य युवाबाट काठमाडौं मेयरको दाबी गरेका छन् ।
पेशाले इन्जिनियर वैद्यले अतिक्रमित जग्गा बचाउने अभियानमा सक्रिय हुँदै आएका छन् । उनले पुरातात्विक महत्वका क्षेत्रको संरक्षणमा काम गर्दै आएका छन् ।
नेपाल इन्जिनियरिङ एसोसिएसनको पूर्व कोषाध्यक्ष वैद्य, महामन्त्री गगन थापा र नेता प्रकाशमान सिंह निकट छन् ।
तीर्थराम डंगोल, हरिप्रभा खड्गी, निलकाजी शाक्य, प्रगतिमान रञ्जित, राजुराज शाक्य, सपना जोशीलगायतका पाका नेताहरु पनि दाबेदार रहेको महानगरमा आफू निकटलाई टिकट दिन कांग्रेसका शीर्ष नेताबीच नै हानथाप हुने गरेको छ ।
गत निर्वाचनमा काठमाडौं महानगरको प्रमुखमा कांग्रेस पराजित बनेको थियो भने उपमेयरमा हरिप्रभा खड्गी कांग्रेसबाट विजयी भएकी थिइन् । एमालेबाट विजयी विद्यासुन्दर शाक्यले ६४ हजार ९१३ मत ल्याउँदा कांग्रेस उम्मेदवार राजुराज जोशीले ४५ हजार २६९ मत ल्याएका थिए ।
कांग्रेसबाट उपप्रमुखमा विजयी खड्गीले ५८ हजार ९५२ मत प्राप्त गरेकी थिइन् । एमाले र राप्रपाको गठबन्धन बनेको काठमाडौंमा राप्रपाबाट उपप्रमुखमा राजाराम श्रेष्ठले ३४ हजार ८५४ मत ल्याई पराजय भोगेका थिए ।
गोकर्णेश्वर नगरपालिकामा चालिसे र रिसालको दाबी
गोकर्णेश्वर नगरपालिकाको मेयरमा सन्तोष चालिसे नै दोहोरिन चाहेका छन् । यहाँ अर्का युवक दीपक रिसालको पनि दाबी छ । चालिसे बहालवाला मेयर हुन् भने रिसाल कांग्रेसको महासमिति सदस्य हुन् । मेयरका दाबीकर्ता दुबै युवा पुस्ताकै नेताहरु हुन् ।
मेयरमा विजयी चालिसेले गत निर्वाचनमा ९ हजार ९ मत ल्याएका थिए । उनले एमालेका उम्मेदवार पुण्यप्रसाद चौलागाईंलाई पराजित गरेका हुन् । यस पालिकामा उपमेयर पनि कांग्रेसकै शान्ति नेपाल विजयी भएकी थिइन् । नेपालले ८ हजार ५९८ मत ल्याई विजयी हुँदा एमाले उम्मेदवार शान्ति श्रेष्ठले ८ हजार ६२ मत ल्याएर पराजित बनिन् ।
बूढानीलकण्ठ नगरपालिकामा चालिसे र बस्नेतको दाबी
बूढानीलकण्ठको मेयरमा विनोद चालिसेको दाबी छ । चालिसे तत्कालीन कपन गाविसको अध्यक्षमा विजयी भएका थिए । हाल महाधिवेशन प्रतिनिधि हुन् । चालिसेसँगै युवा पुस्ताबाट यो नगरपालिकाबाट कृष्णकुमारी बस्नेत पनि मेयरको आकांक्षी छन् । बस्नेत नेविसंघको पूर्व उपाध्यक्षसमेत हुन् ।
चालिसे महामन्त्री गगन थापा निकट छन् । बस्नेत नेता डा.प्रकाशशरण महत नजिक छन् ।
बूढानीलकण्ठ काठमाडौंको निर्वाचन क्षेत्र ४ र ५ मा पर्छ । काठमाडौं ४ को अधिकांश भाग बूढानीलकण्ठ नगरमा पर्दछ । उम्मेदवार छानिँदा बढी भाग पर्ने काठमाडौं ४ कै भूगोलबाट पर्ने सम्भावना बढी रहेको छ ।
गत निर्वाचनमा यहाँ एमालेका उम्मेदवार विजयी भएका थिए । एमालेबाट मेयरको उम्मेदवार उद्धवप्रसाद खरेलले १३ हजार २४६ मतसहित जित निकालेका थिए ।
कांग्रेस उम्मेदवार राजु श्रेष्ठले ८ हजार ९२७ मत ल्याएर पराजय भोगेका थिए । उपमेयरमा एमालेबाट रमादेवी राईले १३ हजार १८८ मत सहित जित निकाल्दा कांग्रेस उम्मेदवार शुभद्रा खड्काले ९ हजार ७६८ मत ल्याएकी थिइन् ।
नागार्जुन, चन्द्रागिरि र दक्षिणकालीका मेयरको दोहोरिने इच्छा
नागार्र्जुनमा मोहनबहादुर बस्नेत, चन्द्रागिरिमा घनश्याम गिरी र दक्षिणकालीमा मोहन बस्नेत दोहोरिन चाहेका छन् । उनीहरु हालका बहालवाला मेयर हुन् । उनीहरु तीन जना दोहोरिन चाहेकाले अन्यले मुख खोलेका छैनन् ।
नागार्जुनमा मोहनबहादुर बस्नेतले ६ हजार ९६१ मत ल्याई जित निकालेका थिए । उनले एमालेका उम्मेदवार कृष्णहरि खत्रीलाई पराजित गरेका थिए । उपप्रमुखमा भने एमाले उम्मेदवार सुशीला अधिकारी ६ हजार ८७१ मत ल्याएर विजयी भएकी थिइन् । कांग्रेसबाट उपप्रमुख उम्मेदवार कल्याणी खड्का पराजित भएकी थिइन् ।
चन्द्रागिरिमा विजयी कांग्रेस उम्मेदवार घनश्याम गिरीले १३ हजार ३०९ मत ल्याएका थिए । उनले एमाले उम्मेदवार प्रह्लाद बहादुर कार्कीलाई पराजित गरेका थिए । कार्कीले १० हजार ४२१ मत ल्याएका थिए ।
चन्द्रागिरिमा उपप्रमुखमा भने एमाले उम्मेवार विजयी भएकी थिइन् । लिशा नकर्मीले एमालेको तर्फबाट ११ हजार ८३४ मत ल्याउँदा कांग्रेस उम्मेदवार इन्द्रावती श्रेष्ठले ११ हजार २३२ मत ल्याई पराजित बनिन् ।
दक्षिणकालीमा कांग्रेस उम्मेदवार मोहन बस्नेतले गत निर्वाचनमा जित निकालेका थिए । ४ हजार ६९८ मतसहित उनी विजयी हुँदा पराजित एमाले उम्मेदवार शशी शर्मा अर्यालले ४ हजार २६८ मत ल्याएका थिए ।
उप्रमुख पनि कांग्रेस उम्मेदवार विजयी भएकी थिइन् । कांग्रेसबाट उपप्रमुखमा बसन्ती तामाङले ४ हजार ७४९ मत ल्याई निर्वाचित हुँदा एमाले उम्मेदवार मीरा महर्जन पराजित भइन् ।
कीर्तिपुर र शंकरापुरमा पराजित नै उठ्ने लाइनमा
शंकरापुरमा गत निर्वाचनमा मेयरमा पराजित शंकर तिवारी सोही पदमा उठ्ने तरखरमा छन् । तिवारी युवा पुस्ताबाटै उम्मेदवारको दाबी गर्ने तयारीमा छन् ।
गत निर्वाचनमा उनले २ हजार ९४७ मत ल्याएर पराजित बनेका थिए । एमालेबाट विजयी प्रमुखका उम्मेदवार सुवर्ण श्रेष्ठले ४ हजार ८६९ मत सहित जीत निकालेका हुन् ।
शंकरापुरको उपप्रमुख पनि एमालेका उम्मेदवार विजयी भएकी थिइन् । शुक्रलक्ष्मी श्रेष्ठले ५ हजार ४३ मत सहित विजयी हुँदा कांग्रेस उम्मेदवार मञ्जु खड्काले ३ हजार ३०० मत ल्याएकी थिइन् ।
कीर्तिपुरमा राजकुमार नकर्मी पुनः प्रमुखको उम्मेदवार बन्ने दौडमा छन् । गत निर्वाचनमा पराजित नकर्मी कांग्रेसको काठमाडौं जिल्ला उपाध्यक्षसमेत हुन् । जिल्ला उपाध्यक्ष तथा गत निर्वाचनमा पराजित उम्मेदवार भएकाले नकर्मी उम्मेदवार बन्ने सम्भावना रहेको छ ।
उनी युवा उमेर समूहमा भने पर्दैनन् । २०७४ मा मेयरको उम्मेदवार भएका उनले ६ हजार ६१६ मत ल्याई पराजित भएका थिए । विजयी एमालेका उम्मेदवार रमेश महर्जनले ७ हजार ३६० ल्याएका थिए ।
कीर्तिपुरमा उपप्रमुखमा पनि एमाले उम्मेदवारले जित निकालेका थिए । एमालेबाट सरस्वती महर्जनले ६ हजार ८१० मत ल्याउँदा कांग्रेस उम्मेदवार विमला विष्टले ६ हजार ४३ मत ल्याएकी थिइन् ।
प्रतिक्रिया 4