कुखुरा मारिएकोमा पूरै सहर स्तब्ध, प्रहरी अधिकारीमाथि कारबाहीको माग

अमेरिकाको मिसिसिपीस्थित एक सानो सहरमा हालै एउटा कुखुरा मारियो । कुखुरा मारिएसँगै १८ हजार जनसंख्या भएको सहरमा तहल्का मच्चियो । पूरै सहर स्तब्ध भयो ।

एकजना पुलिस अधिकारीमाथि कुखुरा मारेको आरोप लाग्यो र महिला प्रहरी अधिकारीलाई कारबाही गर्न सहरवासीले माग गरेका छन् । भालेको नाम कार्ल थियो । कुखुरा ओसन स्प्रिंग्सको सडकमा रातदिन डुल्दथ्यो भने बिहान स्थानीय व्यक्तिका पसलसम्म पुग्थ्यो ।  सबै पसलेले उसलाई पानी र चारो खान दिन्थे ।

यति मात्र होइन उक्त कुखुरा फिटनेस कक्षामा पनि जान्थ्यो । कुखुरा यतिधेरै मिलनसार थियो कि मानिसहरुसँग गएर तस्वीरका लागि पोज समेत दिन्थ्यो । बेलाबेलामा सहरमा यत्रतत्र गएर रेलिङमा सुतेको देखिन्थ्यो ।

केही दिनअघि कार्ल एक्कासी गायब भयो । एक प्रकारले उसको अपहरण भयो । एक महिला पुलिस अधिकारीले उक्त कुखुरालाई अपहरण गरेर मारेको आरोप लागेको छ । मारिएको कुखुरा अहिलेसम्म फेला परेको छैन ।

त्यसपछि बालबालिकाहरुले कार्लको यादमा प्रेमपत्र लेखे र पूरै सहरका ढोकाढोकामा टाँसिदिए । स्थानीय कलाकारले कुखुराको सम्झनामा भित्तेचित्र पनि बनाए ।

कार्ल बस्ने गरेको टाटु पार्लरका टाटु आर्टिस्टका अनुसार अप्रिल २५ मा जब उनी आफ्नो पार्लरमा पुगे त्यहाँ कार्लको अत्तोपत्तो थिएन । दुई चार दिनसम्म पनि कार्ल घर नफर्किएपछि उनले कार्ल कुखुराको खोजी सुरु गरे ।

सीसीटीभी फुटेजमा चाहिं अप्रिल २४ को बिहान ३ बजे तीन जना पुरुषसँगै एक महिला आएर कार्ललाई समातेर लगेको देखियो । फुटेजमा देखिएकी महिलाको नाम केन्द्र शफर हो । उनी एक प्रहरी अधिकारी हुन् । सीसीटीभी फुटेजमा शेफरले लगेको करिब १५ मिनेटपछि कार्ललाई मारेर पार्किङमा डम्प गरेको देखिन्छ ।

त्यसको एक घण्टापछि एक जना पुरुष आएर कुखुराको शरीरलाई प्लास्टिकको थैलीमा हालेर लगेको देखिन्छ । उक्त घटनापछि पशु क्रूरताको मुद्दामा शेफरलाई प्रहरीले सूचना जारी गरेको छ र जागिरबाट पनि निकालिदिएको छ ।

एजेन्सी