इम्बोस्ड प्लेट महँगो र गुणस्तरहीन भयो, जडान गर्न धम्की नदिइयोस् : थापा

२३ जेठ, काठमाडौं । नेपाली कांग्रेसका महामन्त्री गगन थापाले इम्बोस्ड प्लेट जडानमा जबरजस्ती नगर्न माग गरेका छन् । उनले पूर्वाधार तयार नगरी नागरिकलाई धम्कीको भाषामा जारी गरिएको सूचना खारेज गर्न माग गरेका हुन् ।

संसदमा विशेष समयमा बोल्दै थापाले इम्बोस्ड नम्बर प्लेटबारेका व्यवस्थाहरु सच्याउनुपर्नेमा सरकारले सजिलो तर, गलत बाटो लिएको टिप्पणी गरे । गण्डकी र बाग्मती प्रदेशमा साउन १ दखि इम्बोस्ड नम्बर प्लेट नलगाए कारवाही हुने भन्दै शुक्रबार यातायात व्यवस्था विभागले सूचना जारी गरेको थियो ।

मन्त्री थापाले सरकारले राजपत्रमा सूचना प्रकाशित गरेर मंसिरबाटै इम्बोस्ड नम्बर प्लेट जडानको लागि तालिका बनाए पनि अहिलेसम्म सबै यातायात कार्यालयमा काम नै सुरु नभएको बताए ।

‘प्लेट जडानको काम सुरु नभएकोमा ताकेता कार्यालयमा गर्ने कि नागरिकलाई तर्साउने ?’ थापाले प्रश्न गरे ।

ठेकदार कम्पनीसँगको सम्झौताअनुसार १६ महनाभित्रै यो जडानको काम टुंग्याइनुपर्ने अवस्था रहेको भन्दै उनले प्लेट जडानको काम नसकिए सरकारले आर्थिक दायित्व बेहोर्नुपर्ने अवस्था रहेको स्मरण गराए ।

‘सरकारले भनेको काम भनेको समयमा नगर्ने, अनि आफूले कमी कमजोरी गरेर नागरिकलाई दुःख सजाय दिने ? थापाले प्रश्न गरे,’अबको १५ महिनामा २५ लाख सवारीमा इम्बोस्ड जोड्ने भनिएको छ, दिनको ५ हजारमा इम्बोस्ड जोड्नुपर्छ, कसरी सम्भव छ, २-३ वटा कार्यालयबाट ?’

यो पनि पढ्नुहोस

कार्यालयहरू तयार नहुँदै इम्बोस्ड प्लेट अनिवार्य, नजोडे कारबाही

इम्बोस्ड नम्बर प्लेट महँगो भएको, गुणस्तर नभएको भनेर नागरिकले गुनासो गरिरहेको भन्दै थापाले खाल्डाखुल्डी भएको रोडमा प्लेट नै खसिरहेको बताए ।

‘आवश्यक छ, तर, त्यसको कार्यान्वयन प्रभावकारी हनुपर्छ,’ महामन्त्री थापाले भने,’नागरिकको प्रश्न ठेकदार कम्पनी र ऊसँग भएको सम्झौतामथिमा पनि छ, प्लेटमा देवनागरीमा बंगलादेशले लेख्यो भने नेपालमा किन सम्भव भएन ?’

उनले सरकारले नामाकरण भएका प्रदेशमा यो प्लेट लागू गर्न भनिए पनि बाग्मती र गण्डकी बाहेकका प्रदेशमा अत्तोपत्तो नभएको बताए । भारतसँग तुलना गर्दा ५-६ गुणा बढी शुल्क लिइएकोमा पनि कांग्रेस महामन्त्री थापाले असन्तुष्टि पोखे । इम्बोस्डले राष्ट्रिय सुरक्षाका लागि मद्दत गर्छ भने राज्यको पनि जिम्मेवारी हुने उनको भनाइ छ ।

‘साउन १ गतेभित्र जडान नगर्ने भए देखाइदिन्छु भनेर दिइएको धम्कीको यो भाषा खारेज गर्नुपर्छ,’ उनले भने,’इम्बोस्स्ड प्लेटका व्यवस्थाहरु तत्काल पुनरावलोकन गरियोस्, पूर्वाधार र जनशक्ति थपियोस्, गुणस्तरीय बनाइयोस्, जबरजस्ती नगरियोस्, नागरिकले अवज्ञा गर्छन्, त्यतिबला सरकारको मुख रातो हुन्छ ।’

भिडियो हेर्नुस्