+
+

होटल कर्मचारीको बयान : सन्दीपले एउटा कोठा चाहिन्छ भन्दै फोन गरेका थिए

अनलाइनखबर अनलाइनखबर
२०७९ कात्तिक १४ गते १८:१७

१४ कात्तिक, काठमाडौं । क्रिकेटर सन्दीप लामिछाने मुछिएको बलात्कार प्रकरणमा घटनास्थल भनिएको होटलका कर्मचारीले लामिछानले फोन गरेर कोठा बुक गरेको बयान दिएका छन् ।

जिल्ला सरकारी वकिलको कार्यालय, काठमाडौंले अदालतमा दायर गरेको अभियोग पत्रमा उल्लेखित होटल काठमाडौं इनका रिसेप्सनिस्ट अनिश श्रेष्ठको बयानमा लामिछानेले फोन गरेर ‘एउटा कोठा चाहिएको’ भनेको उल्लेख गरेका छन् ।

‘५ भदौमा राति ११ बजेतिर रिसेप्सनमा जडान गरेको ०१–४४…. नम्बरको ल्याण्डलाइनमा फोन गरेर म होटल आउँदैछु, मलाई एउटा कोठा चाहिन्छ । छ/छैन भन्दा मैले कोठा छ भनेको थिएँ’, श्रेष्ठले भनेका छन्, ‘मैले कोठा छ भनेर निजले फोन गरेकै समयमा ४०७ नम्बर कोठा सोही होटलमा काम गर्ने सबिन श्रेष्ठलाई सरसफाइ गर्न लगाएको थिएँ ।’

फोन गरेको २०/२५ मिनेटमा लामिछाने गाडी लिएर होटल बाहिर आएको उनले भनेका छन् ।

‘बाहिर निस्किएर हेर्दा लामिछानेले होटल बाहिर गाडी रोके भने गाडीबाट उनीसँग आएकी किशोरी ओर्लिएर रिसेप्सनमा कोठाको चाबी दिनु भनी मागेकी थिइन्’, उनले भनेका छन्, ‘सरसफाई गरी रिसेप्सनको अगाडिको टेबलमा श्रेष्ठले छाडेको ४०७ नम्बरको कोठाको चाबी दिएको थिएँ ।’

पछि रिसेप्सनमा फोन गरेर ‘कोठाको एसी चलेन, साङ्लाहरु पनि रहेछ’ भनेपछि जाँच गर्न पठाएको उनले बताएका छन् । त्यसपछि अर्को कोठा चाहियो भनेर लामिछानेले भनेपछि २०५ नम्बरको कोठा खाली भएकाले ‘त्यहाँ गएर बस्दै गर्न’ भनेको श्रेष्ठको भनाइ छ । त्यसपछि उनीहरु त्यहीँ बसेको उनको बयान छ ।

बलात्कार भएकोबारे २२ भदौमा विभिन्न सञ्चारमाध्यममा समाचार आएपछि मात्रै थाहा पाएको उनले भनेका छन् ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?