दिदीबहिनीलाई जनता बनाएर यो घरको बुइँगलमा भाषण गर्थे गिरिजाप्रसाद (भिडियो)

१५ कात्तिक, विराटनगर । पाना उराँव ०३४ सालमा विराटनगरको कोइराला निवास आइन् । बीपी कोइराला त्यसबेला जीवितै थिए । त्यसयता घरका सदस्य कति बिते, कति नयाँ थपिए । पाना उराँव त्यही घरको रक्षा र सेवामा अनवरत छिन् ।

पानाले बिहे गरिनन् । आफ्नो छुट्टै परिवार बनाइनन् । कृष्णप्रसाद कोइरालाले जमिन किनेर बनाएको कोइराला निवासलाई नै आफ्नो परिवार मानेर ६२ वर्षको उमेरसम्म उनी यहीँ छन् ।

अनलाइनखबरले यसपल्ट उनै पानाको आँखाबाट कोइराला निवासलाई चिहायो । यो परिवारभित्रका अक्षुण्ण आदर्शहरु, नेपाली समाजलाई यो परिवारले दिएका संस्कार, अनि पारेका प्रगतिशील प्रभावहरु पानाले देखिन् ।

विराटनगर कोशी अस्पताल नजिकै कोइराला निवास छ । पानाको आफ्नो पुरानो घर यहाँबाट हिँड्दै गए पुगिने दूरीमै छ । उनका दाजुभाइ यहाँ आइराख्छन् । उनी पनि गइराख्छिन् ।

तर उनको मूख्य काम कोइराला परिवारको विरासत जोगाउनु नै हो । कांग्रेस वरिष्ठ नेता शेखर कोइराला अहिले पनि यसै घरमा बस्छन् । उनकी आमा नोना कोइरालाले जतनले स्याहारेको घरमा बास बस्न गिरिजाप्रसाद कोइराला पुगिराख्थे । अनि नोनासँग समेत परामर्श लिँदै दूरगामी महत्वका, कहिलकाहिँ विवादास्पद वक्तव्य पनि दिन्थे ।

अनलाइनखबरका विराटनगर सहकर्मी हरि अधिकारी, अनि काठमाडौंबाट मसँगै आएका भिडियोकर्मी शंकर गिरिसहित हामीले पछ्यायौं, उनै पाना उराँवलाई । यो भिडियोमा उनले इतिहासका महत्वपूर्ण घटनाहरु सम्झेकी छन् ।

उनले कोठाचोटाहरु घुमाइन् । भान्छा, पुस्तकालय, भेटघाट कक्षदेखि बुइँगलसम्मै पुर्‍याइन् । गिरिजाबाबुले चढ्ने मोटरदेखि उनले बाथरुममा नुहाउँदा प्रयोग गर्ने जग र बाल्टीसमेत हामीले देख्यौं । अनि देख्यौं, कोइरालाहरुकै जस्तो लामो नाक भएका देउताका मुर्तिहरुसमेत । यी सबै वृत्तान्त भिडियोमा छ ।

‘यहाँनेर गिरिजा बुबाले नोना आमा, दिदीबहिनीहरुलाई जनता बनाएर भाषण गर्नुहुन्थ्यो,’ पानाले बुइँगलमा लगेर भन्दा त्यहाँको अँध्यारोमा हाम्रा आँखा चम्किइरहेका थिए । उनले थपिन्, ‘उहाँले यहीँको अँध्यारोमा फोटो धुलाउनुहुन्थ्यो ।’

पहिले कोइराला निवास ठूलो थियो । अहिले मातृका, बीपी, जीपीका सन्तानहरुले घरमा बार र पर्खालहरु लगाएर चर्चिन थालेका छन् ।