फेस्टिभलका प्रमुख जुरीले ‘कश्मीर फाइल्स’लाई प्रपोगाण्डा र अश्लील भनेपछि बलिउडमा तरंग

काठमाडौं । विवेक अग्निहोत्री निर्देशित बलिउड फिल्म ‘द कश्मीर फाइल्स’ यतिबेला पुनः चर्चामा छ ।  फिल्म निर्माता नदाव लेपिड र इन्टरनेसनल फिल्म फेस्टिभल अफ इन्डिया (आईएफएफआई)का प्रमुख जुरीले फिल्मलाई ‘भल्गर प्रपोगाण्डा’ बताएपछि बलिउड तरंगित बनेको छ ।

भारतका लागि इजरायली राजदूतले समेत यो फिल्म प्रपोगाण्डा भएको बताएका छन् । ‘द कश्मीर फाइल्स’ले ९० को दशकमा कश्मीर घाँटीमा त्यहाँका हिन्दू पण्डितमाथि भएको बर्बरता र पलायनको घटनालाई चित्रण गर्छ । बलिउडमा यो फिल्म यस वर्षकै सर्वाधिक नाफा कमाउने फिल्म समेत बनेको छ ।

गोवामा आयोजित ५३ औं फिल्म फेस्टिभल समापन कार्यक्रममा बोल्दै नदाव लेपिडले उक्त बयान दिएका थिए । उनले बोलिरहँदा मञ्चमा केन्द्रीय मन्त्री अनुराग ठाकुरसहित केही ठूला नेता उपस्थित थिए ।

नदाव लेपिडले भने, ‘द कश्मीर फाइल्स हेरेपछि हामी स्तब्ध र डिस्टर्ब थियौं । यो फिल्म हामीलाई भल्गर र प्रपोगाण्डाजस्तो लाग्यो । यति ठूलो फिल्म फेस्टिभललाई यो फिल्म ठीक थिएन । म आफ्नो भावनालाई खुलेर बाँडिरहेको छु । हामी आलोचनालाई स्वीकार्छौं र त्यसमाथि चर्चा पनि गर्छौं । यो इभेन्टमा कश्मीर फाइल्सबाट हामी सबै चिन्तित भयौं । यो सबैलाई हैरान बनाउने फिल्म थियो ।’

यतिबेला सामाजिक सञ्जालमा लेपिडको भिडियो भाइरल बनिरहेको छ । अभिनेता अनुपम खेरदेखि अशोक पण्डितसम्म उक्त अभिव्यक्तिको विरोधमा उत्रिएका छन् । दर्शन कुमारले फिल्म अश्लीलतामाथि नभएर वास्तविकतामा आधारित भएको बताए ।

भारतीय प्रधानमन्त्री नरेन्द्र मोदीले यसअघि द कश्मीर फाइल्सको प्रशंसा गरेका थिए । उनले यस्तो खालका फिल्म बन्न जरुरी भएको भन्दै यसले सत्य बाहिर आउने बताएका थिए ।