कर्णालीका मुख्यमन्त्री शर्माको शपथ अपराह्न

२८ पुस, सुर्खेत । कर्णाली प्रदेशका मुख्यमन्त्री राजकुमार शर्माले आज पद तथा गोपनीयताको शपथ लिने भएका छन् ।

माओवादी केन्द्रका संसदीय दलका नेता समेत रहेका शर्मा बुधबार मात्र मुख्यमन्त्री नियुक्त भएका थिए ।

माओवादी नेताहरुका अनुसार आज ४ बजे मुख्यमन्त्रीको शपथ ग्रहण तय भएको छ । मुख्यमन्त्री शर्माले सानो आकारको मन्त्रिपरिषद् पनि गठन गर्ने तयारी गरेका छन् । यसका लागि दुवै दल छलफलमा छन् ।

मन्त्रीको नाम भने तय भइसकेको छैन ।

एमाले र माओवादी केन्द्रबीच मन्त्रालयको संख्या भने भागबण्डा भइसकेको छ । बुधबार भएको चारबुँदे सहमतिअनुसार माओवादीले ४ र एमालेले तीन वटा मन्त्रालय लिनेछ ।