नेपाल प्रहरी शिक्षालय भरतपुरमा साढे ५ करोडको लगानीमा प्रशासनिक भवन बन्दै

१५ माघ, चितवन । नेपाल प्रहरी शिक्षालय भरतपुरमा साढे ५ करोडको लागतमा नयाँ प्रशासनिक भवन बन्ने भएको छ ।

सो भवनका लागि टेण्डर आह्वान भएर कस्मिक निर्माण सेवाले भवन बनाउने ठेक्का पाएको शिक्षालयबाट हालै सरुवा भएर गएका शिक्षालयका प्रहरी नायव महानिरीक्षक सन्दिप भण्डारीले जानकारी दिए ।

उनका अनुसार कस्मिकले साढे ३ तला भवन बनाउन ५ करोड ३२ लाख ९१ हजारमा १५ महिना भित्र काम सक्ने गरी ठेक्का लिएको हो । अहिलेको भवन जीर्ण, साँघुरो तथा प्रशासनिक कामकाज गर्न निकै समस्या भएकाले नयाँ भवन बनाउन लागिएको हो ।

प्रहरी प्रधान कार्यालयले ५० लाख रकम भवनका लागि चालु बर्षमा विनियोजन गरेर निकासा गरेको छ । बाँकी रकम पनि माग गरिएको छ । शिक्षालयमा रहेका सालका रुख जोगाउने गरी जग्गा तयार गरिएको डीआइजी भण्डारीले जानकारी दिए । ३४ विगाहामा फैलिएको शिक्षालयमा बन्ने संरचनाहरुका गुरुयोजनाका लागि समेत काम भएको उनले बताए ।

६ महिनामा ९३१ प्रहरी दीक्षित, ८६८ तालिममा

प्रहरी शिक्षालयमा चालु आर्थिक वर्षमा विभिन्न सेवा समूह र पद गरेर ९३१ जना दीक्षित भएर कार्य क्षेत्रमा खटिसकेका छन् । आधारभूत तालिमतर्फ प्रहरी सहायक निरीक्षक ५०१, प्रहरी जवान २९९, प्रहरी अधिकृत प्राविधिकतर्फ १३१ जना दीक्षित भएका हुन् ।

शिक्षालयमा अहिले विशिष्ट व्यक्तिहरुको सुरक्षा सम्वन्धी तालिममा ३० जनाले प्रशिक्षण लिइरहेका छन् । प्रहरी सहायक निरीक्षकतर्फ ४३१, प्राविधिक प्रहरी जवान ४०७ जनाले शिक्षालयमा तालिम लिइरहेको डीआइजी भण्डारीले जानकारी दिए । प्राविधिक प्रहरी जवान केही दिन पछि नै दीक्षित भएर कार्य क्षेत्रमा जाने तयारीमा छन् ।

शिक्षालयमा चालु आर्थिक वर्षमा आधारभूत तर्फ १ हजार ८९३ र सेवाकालिनतर्फ ५६४ जनालाई तालिम दिने लक्ष्य राखिएको छ । डीआइजी भण्डारीले जुनियर प्रहरी अधिकृत र जवानको क्षमताको पहिचान गरी आवश्यकता अनुसार तालिम सञ्चालन गरेर दक्ष जनशक्ति उत्पादन गर्नु शिक्षालयको उद्देश्य रहेको बताए ।