प्रदेश १ को नाम आजै टुंगो लगाउने कार्यसूची

१७ फागुन, विराटनगर । प्रदेश १ को प्रदेशसभा सचिवालयले प्रदेशको नाममा आजै निर्णय गर्ने कार्यसूची बनाएको छ ।

प्रदेश सभा सचिवालयका सचिव गोपालप्रसाद पराजुलीका अनुसार संविधानको धारा २९५(२) बमोजिम आजको बैठकमा नामकरणका लागि प्रस्ताव पेस हुने र आजै निर्णय हुने कार्यसूची छ । प्रदेश सभाको पहिलो अधिवेशनको १३ औं बैठक आज दिउँसो बस्दैछ ।

प्रदेश १ को नाम टुङ्गो लगाउन दलहरु सहमत छन् । नेपाली कांग्रेस र नेकपा एमालेले कोसी नाम प्रस्ताव गर्ने तयारी गरेका छन् । माओवादी केन्द्रसहित साना दलले पहिचानसहितको नाम प्रस्ताव गर्ने तयारी गरेका छन् ।

प्रदेश सभा सचिवालयले सांसदहरूलाई प्रदेशको नामसम्बन्धी प्रस्ताव सचिवालयमा दर्ताका लागि पनि सूचना जारी गरेको छ ।

प्रदेशसभा सचिव पराजुलीले आज बिहान १० बजेदेखि दिउँसो १२ बजेसम्मको समय दिएर सचिवालयमा प्रदेशको नामकरणसम्बन्धी प्रस्ताव पेस गराउन सूचना जारी गरेका छन् ।

९३ सदस्यीय प्रदेशसभामा नाम पारित गर्न दुई तिहाइ बहुमत चाहिन्छ । ४० सिटको नेकपा एमाले र २९ सिटको नेपाली कांग्रेस एक ठाउँमा उभिंदा दुई तिहाइ पुग्छ ।

कांग्रेस एमालेले भूगोलका आधारमा कोसी नाम पारित गर्ने तयारी गरेपछि पहिचानसहितको नाम छलफलका लागि प्रस्ताव गर्ने माओवादीका एक सांसदले बताए ।