कसरी सफा गर्ने महिनावारी कप ?
२०७९ फागुन २५ गते १५:१६ 
महिनावारीको समयमा अहिले महिनावारी कपले धेरै महिलालाई सहज बनाइदिएको छ । यसको प्रयोग गर्ने तरिका मात्रै होइन सफाइ गर्ने प्रक्रियालाई पनि विशेष ध्यान राख्नुपर्ने हुन्छ ।
महिनावारी कपको ‘सेराइल मेन्टेन’ गर्नुपर्ने हुन्छ । सेराइल भनेको कीटाणुरहित बनाउने प्रक्रिया हो । सफा पानीमा डेटोल वा स्लोभन पानी राखेर वा तातो पानीमा मात्रै पनि डुबाउँदा यो कीटाणुरहित हुन्छ । त्यसपछि यसको पुनः प्रयोग गर्न सकिन्छ ।
एउटै महिनावरी कप पटकपटक प्रयोग गर्न सकिन्छ ?
एकपटक लगाएको महिनावारी कपलाई लामो समयसम्म प्रयोग गर्नुहुँदैन । कम्तीमा ४ देखि ६ घण्टाको अन्तरालमा कप फेर्नुपर्ने हुन्छ । यो महिनावारी कपमा मात्र होइन, स्यानिटरी प्याड, पुनः प्रयोग गर्न मिल्ने प्याडमा यो नियम लागु हुन्छ । पूरै दिन महिनावारी कपको प्रयोग लगातार गर्नुहुँदैन ।
महिनावारीको कपको समय-समयमा परिवर्तन नगरे ब्याक्टेरियाको संक्रमण हुन्छ । यसले शरीरमा ठूलै हानि पनि गर्न सक्छ ।
कतिबेला सफा गर्ने ?
रगत भरिएपछि महिनावारी कपलाई निकाल्नुपर्छ । त्यसपछि तातोपानीमा डुबाइदिने, त्यसपछि स्लोभन, डेटल वा एन्टिसेप्टिक समाधान राखेर कपलाई आधा घण्टा डुबाएर राख्नुपर्छ । त्यसपछि निकालेर ड्राइ (सुख्खा) भइसकेपछि लगाउनुपर्छ ।
यसलाई सादा पानीले मात्र पखाल्दा सफा हुँदैन । सफा पानीमा पनि कीटाणु हुन सक्छ, त्यसैले कीटाणुरहित हुनेगरी सफा गर्नुपर्छ ।
कपलाई साबुनले पनि धुन सकिन्छ । तर साबुनको गुणस्तर सबैलाई थाहा नहुने भएकाले एन्टिसेप्टिक समाधान नै उत्तम हुन्छ ।
महिनावारी कपको माध्यमले संक्रमणको जोखिम कति ?
महिनावारीको समयमा प्रयोग गरिने प्रायः साधन जोखिमयुक्त नै हुन्छन् । तर पनि स्यानिटरी प्याडको तुलनामा महिनावारी कप अलि बढी जोखिमपूर्ण हुन्छ । महिनावारी कपमा रगत भरिने भएकाले यसले छिटो संक्रमण गर्न सक्छ ।
यसलाई हातैले लगाउनुपर्ने भएकाले त्यहाँबाट पनि संक्रमण सर्ने सम्भावना हुन्छ । त्यसैले राम्ररी हात धोएर मात्रै महिनावारी कप लगाउनुपर्छ ।
प्रयोगपछि कसरी राख्ने ?
महिनावारी कप प्रयोग गरिसकेपछि तातोपानीमा एन्टिसेप्टिक राखेर त्यसमा ३० मिनेट त्यत्तिकै छाड्ने । त्यसलाई निकालेर सुख्खा बनाएर कपडा वा कुनै सफा झोलामा राखेर अरु व्यक्तिको हात नपर्ने र फोहोर नहुने ठाउँमा राख्नुपर्छ ।
कति वर्षसम्म महिनावारी कप प्रयोग गर्न सकिन्छ ?
सरसफाइमा ध्यान दिए एउटै महिनावारी कप पुनः प्रयोग गरिरहन सकिन्छ । तर एकपटक खरिद गरेको कप बढीमा एक वर्षसम्म प्रयोग गर्नु उपयुक्त हुन्छ । किनकि धेरै प्रयोग गरिसकेपछि यसले शरीरमा संक्रमण हुन सक्छ ।
प्रतिक्रिया 4