आर्मी र सातदोबाटोको रोमाञ्चक बराबरी

२६ चैत, काठमाडौं । शहीद स्मारक ए डिभिजन लिगमा आइतबार त्रिभुवन आर्मी फुटबल क्लब र सातदोबाटो युथ क्लबलले ३-३ को रोमाञ्चक बराबरी खेलेका छन् ।

दशरथ रंगशालमा भएको खेलमा आर्मीले तीन पटक अग्रता लिएर पनि जोगाउन नसक्दा अंक बाँड्न बाध्य भयो ।

आर्मीका लागि जिलेस्पी जंग कार्कीले दुई गोल गरे पनि जिताउन सकेनन् । सातदोबाटोका विलियम असिएडुले ८५औं मिनेटमा गोल गरेपछि खेल ३-३ को बराबरीमा सकियो ।

खेलको चौथो मिनेटमै जिलेस्पीले गोल गर्दै आर्मीलाई अग्रता दिलाएका थिए ।

तर जारी लिगमा उत्कृष्ट फर्ममा रहेका दिपक सिह ठकुरीले २५औं मिनेटमा सातदोबाटोका लागि बराबरी गोल फर्काए । लिगमा उनले सर्वाधिक ६ गोल गरिसकेका छन् ।

जिलेस्पीले २८औं मिनेटमा गोल गर्दै आर्मीलाई पहिलो हाफमा २-१ को अग्रता दिलायो ।

तर दोस्रो हाफको तेस्रो मिनेटमै सातदोबाटोका सर्दोरबेकले गोल गर्दै खेल २-२ को बराबरीमा पुर्‍याए ।

५२औं मिनेटमा आर्मीले फेरि अग्रता लियो । यसपटक दिपक गुरुङले गोल गरे ।

तर यो अग्रता आर्मीले अन्तिमतिर जोगाउन सकेन । असिएडुले ८५औं मिनेटमा गोल गर्दै खेल ३-३ को बराबरी गरे ।

बराबरीपछि ७ खेलबाट १३ अंक जोडेको सातदोबाटो तेस्रो स्थानमा उक्लेको छ । आर्मीले भने शीर्ष ६ मा पुग्ने अवसर गुमायो । ७ खेलबाट ९ अंक जोडेको आर्मी आठौं स्थानमा छ ।