नेपालको पहिलो खेल : प्रतिस्पर्धा कम, कमजोरी चिन्ने मौका धेरै

८ जेठ, काटमाडौं । नेपाली महिला भलिबल टिमले काभा वुमन्स् च्यालेन्ज कपको आफ्नो पहिलो खेलमा किर्गिस्तानलाई ३-० को सोझो सेटमा पराजित गर्‍यो ।

तुलनात्मक रुपमा कमजोर किर्गिस्तानमाथिको जित अपेक्षित नै थियो । तर यो खेलले नेपाललाई आफ्नो कमजोर चिन्ने अवसर भने दिएको छ । दुई पटकको डिफेन्डिङ च्याम्पियन नेपालले आफ्नो खेलमा उल्लेख्य सुधार नगरे दक्षिण एसियाकै जायन्ट भारतसँग खेल्न मुस्किल हुने देखिन्छ ।

त्रिपुरेश्वरस्थित कभर्ड हलमा भएको खेलमा नेपाल सर्भिस र रिसिभमा चुक्यो । खेलअघि धेरै प्रश्न उठेको ओपन स्पाइक (आउटसाइड स्पाइक) मा उषा भण्डारी र निरुता ठगुन्नाको जोडीले मन जित्यो ।

नेपालको ओपनस्पाइकमा प्रतिभा माली र सरस्वती चौधरीको जोडी राम्रै जमेको थियो । तर प्रतियोगिता सुरु हुनु अघि नै प्रतिभा घाइते भइन् भने सरस्वतीलाई पनि अभ्यासको दौरान चोट लागेकाले नेपाल दबावमा थियो ।

उषा र निरुताको जोडीले सहजरूपमा त्यो जिम्मेवारी सम्हाले ।

डेब्युमा संगम र रिमाको प्रदर्शन

नेपालका लागि मिडल ब्लकरमा संगम महतो र आउटसाइड स्पाइकमा रिमा कुवँरले डेब्यु गरे । संगमले पहिलो सेटमा नै मौका बनाइन् भने रिमाले प्रतिस्थापन हुँदै मैदानमा उत्रिइन् ।

रिमाले खासै खेल देखाउने मौका पाइनन्, संगमको प्रदर्शन भने प्रशंसनीय रह्यो । पहिलो पटक राष्ट्रिय टिममा डेब्यु गरेकी उनले घरेलु मैदान र घरेलु प्रतियोगितामा देखाएको क्वुइक स्पाइकको जादु किर्गितानविरुद्ध पनि कायम राखिन् । संगमले मिडल ब्लकमा सफिया पुनसँग सहकार्य गरेकी थिइन् ।

रिमाले संगमलाई टिमको आवश्यकता अनुसार प्रदर्शन गरिन् । बाँया हाते अपोजिट हिटर रिमाको छरितो रेस्पोन्स भने टिमका लागि निकै राम्रो सावित भयो । ‘दुवै जनाले आफ्नो अनुभवको आधारमा राम्रो गर्नुभयो’ कप्तान अरुणा शाहीले मूल्यांकन छ ।

कमजोरी चिन्ने अवसर

सोमबार नेपालले २०२१ पछि पहिलो पटक अन्तर्राष्ट्रिय म्याच खेलेको थियो, जुन प्रतिस्पर्धात्मक कम, कमजोरी चिन्ने अवसर धेरै भएको बताउँछिन् कप्तान अरुणा शाही ।

लामो समयपछि खेलेको अन्तर्राष्ट्रिय खेल भएकाले पनि होला, सुरुमा नयाँ खेलाडीसँग कोअर्डिनेट गर्न गाह्रो भएको उनले सुनाइन् । पछि राम्रो भएको भन्दै उनले खेलपछि भनिन्, ‘हामीले आज गरेको गल्ती सुधारेर खेल्यौं भने राम्रो गर्न सक्छौं ।’

नेपालले दुई वर्षपछि कुनै अन्तर्राष्ट्रिय प्रतियोगितामा निकालेको यो पहिलो जित हो । त्यति मात्रै होेइन, विदेशी प्रशिक्षकको ३ महिना लामो प्रशिक्षणको पहिलो परीक्षा थियो । त्यसमा महत्वपूर्ण ३ अंक हात पारेकोमा सन्तुष्ट देखिएका प्रशिक्षक जान डी ब्रान्ट भन्छन्, ‘आजको जितले सेमिफाइनल पुग्न सहयोग हुनेछ ।’

नेपालले भोलि बंगलादेशसँग खेल्ने छ । बंगलादेशलाई प्रशिक्षक ब्रान्टले सहज टिमकै रुपमा लिएका छन् । ‘हामीले आजको खेलबाट धेरै सुर्धानुपर्ने हुन्छ र भोलिको खेल पनि जित्नुपर्छ’, उनले भने, ‘एक अंक पाएपछि ५ मिनेट खुसी मनाइराख्नु जरुरी छैन, सर्भिसको लागि जानुपर्छ । निरुताले ६ अंक त्यसरी नै ल्याइन् ।’

प्रशिक्षक ब्रान्ट भारतसँगको खेलबारे भने सतर्क छन् । ‘भारत बलियो टिम हो । अग्लो टिम हो,’ उनले अघि भने, ‘मेरो दिमागमा रणनीति छ । म खेलाडीलाई टिमको आवश्यकता अनुसार प्रयोग गर्छु । म जित्ने तरिकाले योजना बनाउँछु ।’

उनका अनुसार नेपालले डिफेन्ड र सर्भिस राम्रो गर्न सक्छ । ‘हामीले मिडलमा पनि राम्रो गर्न सक्छौं,’ उनले भने, एकदमै स्टुपिड मिस्टेक गरेका छौं, भारतसँग गर्नु हुँदैन ।’