लमजुङको एक रेष्टुरेष्टबाट १ लाखसहित सात जुवाडे पक्राउ

३१ जेठ, गोरखा । लमजुङको दोर्दी गाउँपालिका–४ शेरास्थित ए वान रेष्टुरेष्टबाट सात जना जुवाडे पक्राउ परेका छन् । मंगलवार साँझ ५ बजेको समयमा उनीहरुलाई पक्राउ गरिएको जिल्ला प्रहरी कार्यालय लमजुङले जनाएको छ।

पक्राउ पर्नेमा स्थानीय लिल बहादुर गुरुङ, राम अधिकारी, निल बहादुर गुरुङ, प्रेम कुमार राना, केश राना, कुमार गुरुङ र रेष्टुरेष्ट संचालक परशुराम गुरुङ रहेका छन् ।

हारजीतको बाजी राखी जुवा खेलिरहेको भन्ने गोप्य सूचनाको आधारमा प्रहरीले रेष्टुरेष्टमा खानतलासी गरेको थियो। जुवा खेलिरहेको अवस्थामा भेटेपछि उनीहरुलाइ पक्राउ गरिएको जिल्ला प्रहरी कार्यालय लम्जुङका प्रहरी इन्चार्ज डिएसपी प्रकाश सिर्मलले बताए।

उनीहरुको साथबाट नगद एक लाख १ हजार ६ सय २५ रुपैया र तिन बुक तास बरामद गरिएको उनले जानकारी दिए । ‘मोवाइल बैंकिङ मार्फत अनलाइन रकम भुक्तानी गरेको पनि देखिएको छ, त्यसबारे पनि अनुसन्धान गर्देछौ,’ डिएसपी सिर्मलले भने।

पक्राउ परेकाहरु बिरुद्ध जुवा सम्बन्धी कसुर शिर्षकमा मुद्धा दर्ता गरी आवश्यक अनुसन्धान भइरहेको प्रहरीले जनाएको छ ।