जुकरबर्ग र एलन मस्कले कुस्ती खेल्ने !

८ असार, काठमाडौं। विश्वको प्रविधि जगतका दुई चर्चित अर्बपतिहरु एलन मस्क र मार्क जुकरबर्ग कुस्तीमा भिड्न सहमत भएका छन्।

ट्वीटरका मालिक एलन मस्कले आफूसँग कुस्ती खेल्नका लागि दिएको चुनौतीलाई फेसबुक संस्थापक मार्क जुकरबर्गले स्वीकार गर्दै कुन ठाउँमा लड्ने ? भने चुनौती दिएका छन्।

सबैभन्दा पहिले मस्कले आफ्नो ट्वीटरमा एक ट्वीट गर्दै आफू जुकरबर्गसँग कुस्ती खेल्न तयार भएको बताएका थिए। त्यसपछि मस्कको सोही ट्वीटको स्क्रिनशटसहित कुस्तीमा भिड्ने ठाउँ आफूलाई बताउन आग्रह गर्दै पोस्ट गरे।

जुकरबर्गले भिड्ने ठाउँको नाम बताउन आग्रह गरेपछि एलन मस्क रोकिएनन्। उनले भिडन्तस्थल भेगास अक्टागन रहेको बताए।

स्मरण रहोस् अक्टागन Ultimate Fighting Championship (UFC) bouts  आयोजना हुने तारबारसहितको क्षेत्र हो जुन नेवादाको लस भेगासमा पर्दछ ।

यहीँ महिना ५२ वर्ष पुग्न लागेका मस्कले अर्को ट्वीटमा आफूलाई ध्रुवीय क्षेत्रमा पाइने जनावर वालरससँग तुलना गर्दै आफू केवल विपक्षीमाथि पल्टिने र केही पनि नगर्ने बताए। त्यसपछि उनले वालरसहरुको छोटो भिडियो पनि पोस्ट गरेका छन् जसले के संकेत गर्दछ भने उनले कुस्तीका लागि जुकरबर्गलाई दिएको चुनौती कुनै गम्भीर चुनौती नभएर हँसीमजाक मात्रै हो।

साथै उनले आफूले आफ्ना बच्चाबच्चीलाई उचालेर माथिसम्म फ्याँकेर समाउनु बाहेक कुनै पनि व्यायाम नगरेको पनि बताएका छन्। उता, ३९ वर्षीय जुकरबर्ग भने मार्सल आर्टका खेलाडि नै हुन् र यसमा उनले विभिन्न प्रतियोगितामा पुरस्कार पनि जितेका छन्।

त्यसैले यदि जुकरबर्ग र मस्कबीच कुस्ती खेल भएमा जुकरबर्गले नै बाजी मार्ने अनुमान सोसल मिडियामा धेरैले गरेका छन्। बीबीसीबाट