रुसी पूर्वजासुसले सुरु गरिन् पुरुष लोभ्याउने तालिम, शुल्क प्रतिघण्टा ३२ हजार रुपैयाँ

जासुसीको संसार जति रोचक छ उतिनै गोपनीय पनि छ । आम मानिसहरुले आफ्नै बीचमा रहँदा पनि जासुसहरुका बारेमा पत्ता पाउनै सक्दैनन् ।

आखिर ती जासुसहरुको तालिम कस्तो हुँदो हो र उनीहरु त्यतिधेरै रहस्यमयी हुन सक्छन् ? विश्वमा कैयन् मुर्धन्य जासुसहरुका कथा चर्चित छन्, तर पनि उनीहरुलाई पहिचान गर्न तथा सार्वजनिक रुपमा भेट्न असम्भव नै हुन्छ । यस्तै एकजना रुसी पूर्वजासुस हाल चर्चामा छिन् ।

विदेशी एजेन्टहरुलाई आफ्ना कुरामा अल्झाएर उनीहरुबाट गुह्य कुरा फुकाल्नमा महारथी सावित भएकी महिला जासुस आलिया रोजाले आफ्नो जासुसीको टिप्स तथा ट्रिक्सका विषयमा खुलासा गरेकी छिन् ।

आफूलाई महिला जेम्स बण्ड बताउने ३९ वर्षीया आलिया जासुसीको कला सिकाउन चर्को शुल्क लिएर कक्षा नै चलाउँछिन् । जसमा उनी पुरुषहरुको मनोविज्ञानका विषयमा पढाउँछिन् ।

पुरुषहरुलाई कसरी आफ्नो जालमा पार्ने वा फसाउने भन्ने विषयको उनको उक्त तालिमबाट आलियाले वर्षमा २४ करोड रुपैयाँ कमाउने गरेकी छिन् । उनीसँग २ हजार जना सदस्य भएको एक टिम छ । जो कोही महिलाले उनको त्यो कक्षा लिन सक्ने भन्दै आलियाले भनेकी छिन्, ‘जब मैले कुनै सत्र सञ्चालन गर्छु तब मानिसहरुलाई विशेष रहस्य तथा कला सिकाउनका लागि फेसन प्रस्तुति वा दिउँसोको चियाका लागि निम्तो दिन्छु। त्यहाँ मानिसहरु आउँछन्, एक अर्कासँग भेट्छन्, घुम्छन्, मदिरापान गर्छन् र सम्पर्क स्थापित गर्दछन् ।’

आफ्नो कहानी बताउँदै आलिया भन्छिन्, ‘मेरी आमा र बुवा दुवैजना सोभियत संघको जासुसी सेवाको अंगका रुपमा थिएँ । त्यसैले म पनि त्यहीँ पेसामा लाग्नु स्वभाविक थियो । उनीहरुले मलाई जासुसीका बारेमा सबै सिकाए-कसरी हिंड्ने, मेकअप कसरी लगाउने र सबैभन्दा महत्वपूर्ण कुरा पुरुषहरुको मनोविज्ञान कसरी बुझ्ने ? भन्ने कुरा ।’

उनका अनुसार सशक्त जासुस बन्ने कुरा एउटा महिला जेम्स बण्ड बन्नु जस्तै थियो । बुवाआमाले आफ्नो ओजश्वीपन तथा भावभंगीलाई लोभलाग्दो बनाउने तथा पुरुषलाई आफूतर्फ आकर्षित गर्ने कला सिकाएको र ती सबै विधिलाई आफूले सुरुमा आफ्नो दैनिक जीवनमा लागू गरेको उनी बताउँछिन् ।

उनी भन्छिन्, ‘ऐनाको अगाडि उभिएर हरेक दिन आफूलाई हेर्नुपर्छ र आफ्ना बारेमा पाँचवटा राम्रो चिज खोज्नुहोस् जुन तपाईंलाई मन पर्छ । यो अनुहारको विशेषता हुनसक्छ वा तपाईंको हात वा खुट्टा पनि हुनसक्छ । आफू सर्वोत्कृष्ट छु र म देवी हुँ भन्ने भाव लिनुहोस् ।’

आलियाको सल्लाह छ, कहिल्यै पनि कुनै प्रश्नको सिधा उत्तर नदिनुहोस्, पहिलो डेटमा कुनै पनि पुरुषसँग संसर्ग नगर्नुहोस्, आफ्नो आत्मविश्वास बढाउनका लागि आफूलाई सजाएर राख्नुहोस्, डेटभन्दा पहिले आफूलाई सबैभन्दा राम्रो लुक दिनुहोस्, जो पुरुषसँग तपाईं डेटिंग गर्दै हुनुहुन्छ उसको बारेमा केही न केही कुरा जान्नु भएको छ भन्ने देखाउनुहोस् जसको बारेमा उसले अनुमान लगाउने प्रयास गरोस् ।