विश्वकप क्रिकेटका २० तथ्य, जुन नम्बर त्यही सत्य

नम्बर एक (१) अर्थात पहिलो नम्बर

विश्वकप क्रिकेटको पहिलो संस्करण सन् १९७५ मा इंग्ल्याण्डमा भएको थियो जसको उपाधि पहिलो पटक वेष्ट इण्डिजले जितेको थियो ।

नम्बर दुई (२)

विश्वकप क्रिकेट १९७९ को दोस्रो संस्करणमा विश्वकप इतिहासकै सबैभन्दा थोरै शतक बनेका थिए । यस बिश्वकपमा जम्मा दुईवटा मात्र शतक बनेका थिए । प्रतियोगिताभर वेष्ट इण्डिजका सर गोर्डन ग्रिनिज र सर भिभियन रिचर्ड्सले मात्र शतक बनाएका थिए । अझ रमाइलो कुरा त के छ भनेगोर्डन ग्रिनिजले भारतविरुद्धको उद्घाटन खेलमा र भिभियन रिचर्ड्सले इंग्ल्याण्डविरुद्धको फाइनल खेलमा शतक बनाएका थिए । प्रतियोगिताको अन्य खेलमा भने कुनै पनि खेलाडीले शतक बनाउन सकेनन् ।

श्रीलंकाका लसिथ मलिङ्गाले विश्वकप क्रिकेटमा सबैभन्दा धेरै दुई पटक ह्याट्रिक विकेट लिएका छन् । उनले सन् २००७ को विश्वकपमा दक्षिण अफ्रिका र सन् २०११ को विश्वकपमा केन्याबिरुद्ध उनले लगातार ३ बलमा ३ विकेट लिएका थिए ।

विश्वकप क्रिकेटमा विश्वविजेता राष्ट्रलाई प्रदान गरिने ट्रफीको उचाइ दुई फिटको छ ।

नम्बर तीन (३)

विश्वकप क्रिकेट २००३ मा श्रीलंका र बंगलादेशको खेलमा ओपनिङ्ग बलिङ्ग गरेका श्रीलंकाका चामिण्डा भासले पहिलो तीन बलमा तीन विकेट लिएका थिए । उनले बंगलादेशी ब्याट्सम्यानहरु हनन सरकार, मोहम्मद अश्रफुल र इशानुल हकलाई पहिलो तीन बलमा शून्यमै पभेलियन फर्काइदिएका थिए ।

विश्वकप क्रिकेटको ४८ वर्षको इतिहासमा कुनै पनि इनिङ्गको पहिलो तीन बलमा तीन विकेट गएको यो एउटा मात्र  घटना हो । उक्त ओभरमा भासले ४ विकेट हात पारेका थिए । उनले सोही ओभरको पाँचौ बलमा अर्का ब्याट्सम्यान सन्वर हुसेनलाई चार रनमै पेभेलिएनको बाटो देखाइदिएका थिए ।

नम्बर चार (४)

सन् २००७ को विश्वकप क्रिकेटमा दक्षिण अफ्रिकाविरुद्धको खेलमा श्रीलंकाका लसिथ मलिंगाले चार बलमा लगातार चार विकेट लिँदै विश्व कीर्तिमान राखेका थिए । उनले उक्त सफलता हात पार्ने क्रममा दक्षिण अफ्रिकी ब्याट्सम्यानहरु सन पोलक, एन्ड्र्यु हल, ज्याक्स कालिस र मखाया एन्टिनिलाई आउट गरेका थिए । खेल भने दक्षिण अफ्रिकाले एक विकेटले जितेको थियो ।

श्रीलंकाका विकेटकिपर ब्याट्सम्यान कुमारा सांगकाराले सन् २०१५ को विश्वकपमा चार म्याचमा लगातार चारवटा शतक प्रहार गरेर दुर्लभ कीर्तिमान कायम गरेका थिए । उनले बंगलादेशविरुद्ध अविजित १०५, इंग्ल्याण्डविरुद्ध अविजित ११७, अष्ट्रेलियाविरुद्ध १०४ र स्कटल्याण्डविरुद्ध १२४ रन प्रहार गरेका थिए । विश्वकप इतिहासमा लगातार चार खेलमा चार शतक बनाउने संगाकारा एक्ला खेलाडी हुन् ।

नम्बर पाँच (५)

विश्वकप क्रिकेटको इतिहासमा अष्ट्रेलियाले सबैभन्दा धेरै पाँच पटक उपाधि जितेको छ । उसले सन् १९८७, १९९९, २००३, २००७ र २०१५ मा गरी पाँच पटक उपाधि उचालेको हो ।

नम्बर छ (६)

विश्वकप क्रिकेटको इतिहासमा अहिलेसम्म ६ वटा राष्ट्रले मात्र उपाधि जितेका छन् । पूर्वविश्व विजेता इंग्ल्याण्डसहित अष्ट्रेलिया, वेष्ट इण्डिज, भारत, पाकिस्तान र श्रीलंकाले मात्र उपाधि उचालेका छन् ।

दक्षिण अफ्रिकाका हर्षल गिब्सले विश्वकप क्रिकेट इतिहासमा ६ बलमा ६ छक्का प्रहार गरेर कीर्तिमान कायम गरेका छन् । सन् २००७ को विश्वकपमा  नेदरल्याण्ड्सबिरुद्धको खेलमा उनले स्पिनर डानभान बुंगेलाई ६ छक्का हिर्काएका थिए ।

नम्बर सात (७)

विश्वकप क्रिकेटको इतिहासमा  अहिलेसम्म सबैभन्दा धेरै फाइनल खेल्ने राष्ट्र अष्ट्रेलिया हो । अष्ट्रेलियाले सन् १९७५, १९८७, १९९६, १९९९, २००३, २००७ र २०१५ गरि सातवटा विश्वकपको फाइनल खेलेको छ ।

नम्बर आठ (८)

सन् १९७५, १९७९, १९८३ र १९८७ मा भएको पहिलो चारवटा विश्वकपमा आठ राष्ट्रहरुले मात्र सहभागिता जनाएका थिए ।

नम्बर नौ (९)

विश्वकप क्रिकेटमा भारतका सचिन तेन्दुलकर सबैभन्दा धेरै नौ पटक म्यान अफ द म्याच बनेका छन् । आफूले खेलेका ४५ खेलमध्य नौ खेलमा उनी सर्वोत्कृष्ट खेलाडी बनेका हुन् ।

नम्बर दश (१०)

२०१९ को गत विश्वकपसम्मको नतिजा हेर्दा अहिलेसम्म दशजना कप्तानहरुले विश्वकपको उपाधि जितेका छन् । वेष्ट इण्डिजका क्लिभ लायोड, भारतका कपिल देव र महेन्द्रसिंह धोनी, पाकिस्तानका इमरान खान, श्रीलंकाका अर्जुन रणतुंगा, इंग्ल्याण्डका इयोन मोर्गन र अष्ट्रेलियाका एलन बोर्डर, स्टीभ वाग, रिकी पोन्टिङ्ग र माइकल क्लार्क गरि दश जना कप्तानले आफ्नो राष्ट्रलाई विश्वकप जिताएका छन् ।

नम्बर एघार (११)

विश्वकप क्रिकेट २००३ मा दुईवटा ह्याट्रिक भएका थिए । पहिलो ह्याट्रिक श्रीलंकाका चामिण्डा भासले बङ्ग्लादेशविरुद्ध लिएका थिए भने दोस्रो ह्याट्रिक अष्ट्रेलियाका ब्रेट लीले केन्याविरुद्ध लिएका थिए । चामिण्डा भासले ह्याट्रिक लिएको एघार दिनपछि विश्वकपमा ब्रेट लीले अर्को ह्याट्रिक थपिदिएका थिए ।

नम्बर बाह्र (१२)

क्रिकेट खेलको सुरुवात भएको देश इंग्ल्याण्डले विश्वकप क्रिकेट जित्न १२ वटा संस्करण कुर्नु परेको थियो । सबैभन्दा धेरै पटक विश्वकप आयोजना गरेको इंग्ल्याण्डले २०१९ को बाह्रौं संस्करणमा पहिलो पटक उपाधि जितेको थियो  ।

नम्बर तेह्र (१३)

आगामी बिहीबारदेखि भारतमा सुरु हुन लागेको विश्वकप क्रिकेट-२०२३, विश्वकप क्रिकेटको तेह्रौं संस्करण हो । सन् १९७५ बाट सुरु भएको विश्वकप क्रिकेटको २०२३ सम्म आइपुग्दा तेह्रौंसंस्करण सुरु हुन लागेको हो ।

नम्बर चौध (१४)

विश्वकप क्रिकेटमा अहिलेसम्म चौधवटा राष्ट्रका बलरहरुले ६४ पटक पाँच विकेट हात पारेका छन् । हाल टेष्ट मान्यता प्राप्त  राष्ट्रहरुबाट अफगानिस्तान र आयरल्याण्डका कुनै पनि बलरले अहिलेसम्म एकै खेलमा पाँच विकेट हात पार्न सकेका छैनन् भने एसोसियट राष्ट्रहरुबाट यूएई, नामिबिया, क्यानडा र केन्याका बलरले उक्त सफलता हात पारेका छन् ।

नम्बर पन्ध्र (१५)

भारतका सचिन तेन्दुलकर विश्वकप क्रिकेटमा सबैभन्दा धेरै अर्धशतक बनाउने खेलाडी हुन् । उनले आफूले खेलेका ६ वटा विश्वकपमा १५ अर्धशतक बनाएका छन् ।

विश्वकप क्रिकेटको १३ औं संस्करणसम्म आइपुग्दा पन्ध्रवटा राष्ट्रहरुले विश्वकपको आयोजना गरेका छन् ।

नम्बर सोह्र (१६)

विश्वकप क्रिकेट २००७ मा विश्वकप क्रिकेट इतिहासकै सबैभन्दा धेरै राष्ट्रहरु सहभागी थिए । वेष्ट इण्डिजमा सम्पन्न यस विश्वकपमा सोह्र राष्ट्रहरुको सहभागिता थियो ।

नम्बर सत्र (१७)

सन् २०१९ को विश्वकप क्रिकेटमा अफगानिस्तानविरुद्धको खेलमा इंग्ल्याण्डका कप्तान इयोन मोर्गनले १७ वटा छक्का प्रहार गरेका थिए । यो विश्वकप क्रिकेट इतिहासमा कुनै पनि खेलाडीले एकै इनिङ्गमा प्रहार गरेको सर्वाधिक छक्का हो । उक्त खेलमा मोर्गनले ७१ बलमा १४८ रन बनाएका थिए ।

नम्बर अठार (१८)

सन् २०१५ को विश्वकप क्रिकेटमा इंग्ल्याण्डविरुद्धको खेलमा न्यूजिल्याण्डका कप्तान ब्रेन्डन म्याकुलमले १८ बलमा अर्धशतक प्रहार गरेका थिए । विश्वकप क्रिकेटको इतिहासमा यो सबैभन्दा थोरै बलमा बनाइएको अर्धशतक हो ।

नम्बर उन्नाइस (१९)

विश्वकप क्रिकेटको इतिहासमा अहिलेसम्म उन्नाईसजना ब्याट्सम्यानले १५० रन भन्दा बढीको पारी खेलेका छन् । विश्वकप क्रिकेटको एकै इनिङ्गमा सबैभन्दा धेरै रन बनाउने कीर्तिमान न्यूजिल्याण्डका मार्टिन गुप्तिलले राखेका छन् । उनले सन् २०१५ को विश्वकपमा वेष्ट इण्डिजबिरुद्धको खेलमा २३७ रन बनाएका थिए ।

नम्बर बीस (२०)

विश्वकप क्रिकेटमा अहिलेसम्म बीसवटा राष्ट्रहरुले कम्तीमा पनि एकपटक सहभागीता जनाएका छन् । विश्वकपमा सहभागी हुने सबैभन्दा कान्छो राष्ट्र अफगानिस्तान हो जसले २०१५ मा पहिलोपटक विश्वकप खेलेको थियो ।

(लेखक सिन्धुली एकेडेमीका विज्ञान शिक्षक हुन् ।)