२ पुस, काठमाडौं । प्रधानमन्त्री कप पुरुष राष्ट्रिय क्रिकेट प्रतियोगिताको लागि बागमती प्रदेशको काठमाडौं जिल्ला छनोटमा १२ टोलीले प्रतिस्पर्धा गर्ने भएका छन् ।
काठमाडौं जिल्ला क्रिकेट संघको आयोजनामा हुने छनोट प्रतियोगिता ३ पुसदेखि मूलपानी क्रिकेट मैदानमा हुनेछ ।
सहभागी १२ टिमलाई चार समूहमा विभाजन गरिएको छ ।
समूह ए मा ग्रेट हिमालयन क्रिकेट एकेडेमी, बालुवाटार क्रिकेट क्लब र पुष्पलाल स्पोर्ट्स क्लब छन् ।
समूह बी मा क्रिकेट एक्सिलेन्स सेन्टर, ओएसिस क्रिकेट एकेडेमी र जेम्स थण्डर क्रिकेट एकेडेमी छन् ।
समूह सी मा नेक्सस क्रिकेट एकेडेमी, न्यु भिजन क्लब र डीएभी क्रिकेट एकेडेमी तथा समूह डी मा महावीर क्लब, हिमालयन क्रिकेट एकेडेमी र परेवर ब्वाइज क्लब छन् ।
प्रतियोगिताको खेलहरु लिगकम नकआउटको आधारमा खेलाइनेछ र समूह चरणका सबै खेलहरु २५ ओभरको खेल काठमाडौं जिल्ला क्रिकेट संघले जनाएको छ ।
चारवटै समूहको शीर्ष स्थानमा रहने टोली सेमिफाइनल प्रवेश गर्नेछन् । सेमिफाइनल र फाइनल खेल भने ५० ओभरको हुनेछ ।
प्रतियोगिताको उत्कृष्ट खेलाडी, उत्कृष्ट ब्याटर, उत्कृष्ट बलरलाई श्रेष्ठ टेलरिङको प्रायोजनमा सुट तथा आइटीएल ब्रान्डको मोबाइल प्रदान गरिनेछ । यस्तै प्रत्येक खेलको प्लेअर अफ दि म्याचलाई आइटीएल ब्रान्डको मोबाइल दिने आयोजकले जनाएको छ ।
प्रतिक्रिया 4