कैलाली र कञ्चनपुरमा भन्सार छली नियन्त्रणमा प्रहरी सक्रिय

२ फागुन, धनगढी । कैलाली र कञ्चनपुरमा प्रहरीले तस्करी नियन्त्रणमा सक्रियता देखाएपछि अघिल्ला वर्षहरुमा भन्दा भन्सार छलेर ल्याइएका सामान बरामद दोब्बरले बढेको छ ।

भारतसँग १०१ किलोमिटर खुला सिमाना रहेको कैलालीमा गत साउनदेखि माघ मसान्तसम्म नेपाल प्रहरीले चार करोड ३० लाख १७ हजार रुपैयाँ बराबरको अवैध सामान बरामद गरेको छ । आर्थिक वर्ष २०७९/८० मा दुई करोड १९ लाख ५१ हजार रुपैयाँको सामान बरामद गरेको प्रहरीले यो वर्ष भने ७ महिनामै करीब दोब्बर सामान बरामद गरेको हो ।

कञ्चनपुरमा पनि तस्करीका सामान बरामद बढेको छ । गत साउनदेखि माघ मसान्तसम्म तीन करोड ५० लाख रुपैयाँको सामान बरामद गरेको जिल्ला प्रहरी कार्यालयको तथ्यांक छ ।

गत आर्थिक वर्ष २०७९/८० को १२ महिनामा प्रहरीले दुई करोड २४ लाख रुपैयाँ बराबरको अवैध सामान बरामद गरेको थियो ।

१४ महिनाअघि प्रहरी उपरीक्षक (एसपी) देबेन्द्रबहादुर पाल कैलाली र १२ महिनाअघि प्रहरी उपरीक्षक (एसपी) कमल थापा प्रमुख भएर आएका थिए । प्रहरी प्रधान कार्यालयले मंगलबार दुवै एसपीको सरुवा गरिसकेको छ ।

कैलालीका प्रमुख प्रहरी पालले सीमा नाकामा हुने चोरी, निकासीलाई नियन्त्रणमा प्रगति भएको बताए । ‘सीमा क्षेत्रमा हुने चोरी, निकासीलाई शून्यमा झार्न चेकजाँचमा र लागुऔषध नियन्त्रणमा कडाइ गरेका थियौँ । त्यसैको परिणाम विगतभन्दा बढि राजश्व संकलन गर्न सफल भयौं’, उनले भने ।

कञ्चनपुरका प्रमुख प्रहरी थापा सीमा क्षेत्रमा गरिएको कडाइकै कारण अवैध सामान बरामद दोब्बरले बढेको बताए ।

‘अवैध सामान भण्डार गरिएका गोदाममै छापा हानेर सामान बरामद गरेका थियौ’, थापाले अनलाइनखबरसँग भने, ‘आन्तरिक राजश्व, भन्सार लगायतको समन्वयमा पनि धेरै काम गरेका छौं ।’