सिप मेलाबाट तालिम लिएकालाई रोजगारी दिने निजी क्षेत्रको प्रतिबद्धता

९ जेठ, काठमाडौं । काठमाडौंको टुँडिखेलमा सञ्चालन भइरहेको सिप मेलाबाट तालिम लिएका जनशक्तिलाई रोजगारीको अवसर दिने प्रतिबद्धता निजी क्षेत्रले जनाएको छ ।

काठमाडौं महानगरपालिकाले टुँडिखेलमा सञ्चालन गरेको सिप मेलामा आयोजित अन्तरक्रिया कार्यक्रममा नेपाल उद्योग वाणिज्य महासंघ, गैरसरकारी संस्था, शैक्षिक क्षेत्र लगायतका प्रतिनिधिले यस्तो प्रतिबद्धता जनाएका हुन् ।

महानगरले ‘शिक्षालाई सिपसँग’,‘सिपलाई श्रमसँग’ र ‘श्रमलाई उत्पादनसँग’ जोडेर सिप नहुनेलाई सिपयुक्त बनाउनु, सिप भएकालाई रोजगार तथा स्वरोजगार बनाउने उद्देश्यका साथ मेलाको आयोजना गरेको हो ।

महानगरले २०८१ सालको सुरुमा २ हजार ८१ जनालाई सिपमूलक तालिम दिएर ‘स्वरोजगार’, ‘रोजगार’ र ‘अन द जब ट्रेनिङ’ उपलब्ध गराउने योजना बनाएको छ ।

कसले के भने ?

कार्यक्रममा ज्योती समूहका निर्देशक सौरभ ज्योतिले रोजगारी दिन तयार रहेको जनाए । उद्यमशीलसहित कार्यक्रमलाई एकीकृत अवधारणामा रुपान्तरण गरेर सञ्चालन गर्न महानगरसँग सहकार्य गर्न तयार रहेको उनले बताए ।

नेपाल चेम्बर अफ कमर्सका दिपक श्रेष्ठले उद्योगहरूमा जनशक्ति आवश्यकता अनुसार माग अध्ययन गर्नुपर्ने बताएका थिए ।

होटल संघ नेपालका अध्यक्ष विनायक शाहले गुणस्तरीय कामका लागि सिपयुक्त जनशक्ति आवश्यक रहेको भन्दै हस्पिटालिटीमा सीप सिकेका जनशक्तिलाई रोजगार दिन सकिने बताए ।

नेपाल उद्योग वाणिज्य महासंघका चन्द्रकान्त अधिकारीले निजी क्षेत्रले प्राविधिक जनशक्तिको अभाव महसुस गरिरहेका बताए । तालिम लिएका जनशक्तीलाई क्षमता हेरेर रोजगारी दिन सकिने उनको भनाइ थियो ।

यो पनि पढ्नुहोस

टुँडिखेलमा सिप मेला (तस्वीरहरू)

उच्च शिक्षालय तथा माध्यमिक विद्यालय संघ नेपाल (हिसान) का रामहरि सिलवालले उच्च शिक्षालयमा अध्ययन गरिरहेका विद्यार्थीहरुले बैंकहरूमा मात्रै इन्टर्न गर्न पाएको भन्दै उद्योग क्षेत्रमा पनि अवसर दिनुपर्नै बताएका थिए ।

उद्योग वाणिज्य महासंघ उपाध्यक्ष ज्योत्स्ना श्रेष्ठले तालिमसँगै काम ठूलो र सानो हुँदैन भन्ने भावना विकास गराउनु पर्नेमा जोड दिइन् । मेलाबाट सिप सिकेका जनशक्तिलाई सम्भव भएसम्म धेरैलाई रोजगारी उपलब्ध गराउन आफूहरू तयार रहेको उनले बताइन् ।

कम्प्युटर एससिएसन नेपालका रञ्जितकुमार पोडारले उद्योग र शिक्षा क्षेत्रका बीचमा संवाद नरहेको भन्दै कम्प्युटर इन्जिनियर अध्ययन गर्ने व्यक्तिहरूले इन्टर्न गर्न नपाएका गुनासो गरे ।

कम्प्युटर अध्ययन गरिरहेका विद्यार्थीलाई उद्योगहरूमा इन्टर्नको अवसर प्रदान गर्न सकियो भने युवामा पढेर विदेश जाऔं भन्ने सोच हट्ने उनको भनाइ थियो ।

वाटर एड नेपालका कवीन्द्र पुडासैनीले विदेश जाने युवालाई नेपालमै केही गर्न सकिन्छ भन्ने विश्वास दिलाउनु पर्ने बताए ।

नेपाल तालिम तथा रोजगार व्यवसायी महासंघ (एफ–पीटीईएन) का बद्री दाहालले सिप भएका जनशक्तिले नेपालमा पनि पढ्दै कमाउन सक्ने बताए ।

नेपाल तालिम तथा रोजगार व्यवसायी महासंघका अच्युत नेपालले छोटो अवधिको व्यावसायिक तालिममा आकर्षण देखिएको भन्दै अब १ महिने, ३ महिने, १ वर्षे कोर्षका लागि पनि आकर्षण बढाउनु पर्ने बताए ।

१९ वैशाखदेखि सुरु भएको ‘सिप मेला’ अन्तर्गत १५ दिन अवधिका पहिलो चरणका तालिम कक्षा सकिएको छ । अहिले दोस्रो चरणमा कक्षाहरु सञ्चालन भइरहेको योजना आयोगका सदस्य शैलेन्द्र झाले बताए ।

‘पहिलो चरणमा १ हजार ५७७ जनाका लागि तालिमको कोटा थियो । यसमध्ये १ हजार ५०५ जना तालिममा सहभागी भएका थिए । ६ गतेदेखि १५ दिन अवधिका दोस्रो चरणका कक्षा सुरु भएका छन्,’उनले भने ।