सरप्राइज दिंदै दिलजीत दोसाँझको कन्सर्टमा पुगे क्यानडाका प्रधानमन्त्री जस्टिन ट्रुडो

काठमाडौँ । भारतीय गायक तथा अभिनेता दिलजीत दोसाँझलाई यस वर्ष फापेको देखिन्छ । इम्तियाज अलीसँगको फिल्म ‘चमकिला’मा दिलजीतको निकै प्रशंसा भयो । विदेश भ्रमणमा समेत उनले सफलताको स्वाद चाखिरहेका छन् ।

दिलजीतका लागि यतिबेला अर्को गौरवको क्षण आइपुगेको छ । क्यानडामा उनको शो हेर्न प्रधानमन्त्री जस्टिन ट्रुडो आफैं पुगेका थिए । सो कन्सर्टमा अचानक पुगेका ट्रुडोले दिलजीतसँग तस्वीर खिचे र स्टेजका रमाइला पल पनि सेयर गरे ।

प्रधानमन्त्री ट्रुडोले दिलजीतसँगको तस्वीर सेयर गरेका छन् । पहेंलो सर्ट र रातो पगडी गुथेका दिलजीतले ट्रुडोसँग न्यानो हात मिलाउँदै गरेको देखिन्छ ।

फोटो सेयर गर्दै ट्रुडोले लेखेका छन्, ‘क्यानडा एक महान् देश हो, जहाँ पञ्जाबको केटाले इतिहास रच्न सक्छ र स्टेडियम सोल्ड आउट हुनसक्छन् । विविधता हाम्रो शक्ति मात्र होइन, यो हाम्रो सुपर पावर हो ।’

दिलजीतले ट्रुडोको शोअघिको भिडियो सेयर गरेका थिए । भिडियोमा ट्रुडोले दिलजीतको सम्पूर्ण समूहलाई भेटेर उनको नृत्य र प्रस्तुति हेरिरहेको देखिन्छ । उनले दिलजीतको टिमलाई चियर गर्दै सबैसँग ‘पन्जाबी आ गए ओए’ भन्दै पोज दिइरहेका छन् ।

ट्रुडोसँगको भिडियो सेयर गर्दै दिलजीतले लेखेका छन्, ‘विविधता क्यानडाको बल हो । प्रधानमन्त्री जस्टिन ट्रुडो इतिहास बनिरहेको साक्षी हुन आएका थिए । हामी रोजर्स सेन्टरमा सोल्डआउट भएका छौं ।’ सप्ताहन्तमा दिलजीतले टोरन्टोमा कन्सर्ट गरे । रोजर्स सेन्टरमा कन्सर्ट सोल्डआउट हुने उनी पहिलो पञ्जाबी कलाकार समेत बने ।

पछिल्लो समय उनी लोकप्रिय विश्वव्यापी कलाकार बनिरहेका छन् । हालै उनले जिमी फलनको ‘द टुनाइट शो’मा प्रस्तुति दिए, जसलाई ठूलो अन्तर्राष्ट्रिय प्लाटफर्म मानिन्छ । दिलजीतले कोचेल्लामा पनि प्रदर्शन गरेका थिए र उनको पञ्जाबी फिल्म ‘जट एण्ड जुलिएट ३’ ले उत्तर अमेरिकी बक्स अफिसमा चर्चा बटुल्दैछ ।

‘जट एण्ड जुलिएट ३’ फिल्मको कुरा गर्दा निरु बाजवासँग दिलजीत दोसाँझको यो फिल्मले १५ दिनमा विश्वभर ८६ करोड भारुभन्दा बढीको कलेक्सन गरेको छ । दिलजीतको ‘क्यारी अन जट्टा ३’ पछि यो भारतको दोस्रो सबैभन्दा धेरै कमाउने पञ्जाबी फिल्म बनेको छ ।