महिला र पुरुषमा देखिने यौनरोग ‘ट्राइकोमोनिसिस’ के हो ?

ट्राइकोमोनिसिस यौन प्रसारित रोग हो । जुन ‘ट्राइकोमोनस भेजिनलिज’ परजीवीको संक्रमणको कारण लाग्छ । यो समस्यालाई चिकित्सकीय भाषामा ‘ट्रीच’ पनि भनिन्छ । यो रोग महिला र पुरुष दुवैमा देखिन्छ । तुलनात्मक रुपमा महिलामा यसको लक्षण र संक्रमण देखिने प्रबल सम्भावना हुन्छ ।

यता, पुरुषमा भने यसको लक्षण नदिन पनि सक्छ । ट्राइकोमोनिसिसको समयमै पहिचान र उपचार हुन सकेन भने यो रोगले एचआईभी सहित अन्य यौनरोग पनि गराउन सक्छ ।

विश्वव्यापी रुपमा यो समस्या साझा रूपमै देखिएको पाइन्छ । यौन जीवनमा सक्रिय हुने जो कोही यो समस्याको चपेटामा पर्न सक्छन् । वर्षेनी लाखौं मानिसमा ट्राइकोमोनिसिसको संक्रमणबाट प्रभावित हुन्छन् ।

कसरी लाग्छ ?

ट्राइकोमोनिसिसबाट पहिलै संक्रमित भएकोसँग असुरक्षित यौन सम्बन्ध राख्दा यो रोग लाग्छ । महिलामा यो संक्रमण योनी हुँदै पाठेघरसम्म पुग्न सक्छ । त्यस्तै, पुरुषमा लिंग हुँदै प्रोस्टेट र मूत्रथैलीमा समेत पुग्न सक्छ । कुनै लक्षण नदेखिए पनि संक्रमितबाट यौन खेलौनाको प्रयोग, मुखमैथुन र असुरक्षित यौन सम्बन्धबाट अर्को व्यक्तिलाई सार्न सक्छन् ।

यद्यपि, यो संक्रमित व्यक्तिबाट खाना, कपडा र चुम्बनबाट सर्दैन ।

जोखिम कारक

– एकभन्दा बढी यौन साथी बनाउनु

– असुरक्षित यौन सम्पर्क

– पहिला नै ट्राइकोमोनिसिस भइसकेको अवस्थामा

– अन्य यौन प्रसारित रोग भएमा

लक्षण

धेरैजसोमा ट्राइकोमोनियासिस संक्रमण भएकाहरूमा लक्षण नै देखिंदैन । र, पहिचान छिटो हुन पाउँदैन । महिलाको तुलनामा पुरुषमा प्रायः कुनै लक्षण हुँदैन । यदि महिलामा संक्रमण भएमा लक्षणहरू एक हप्ताभित्र देखा पर्छ ।

महिलामा देखिने लक्षण

– योनीबाट पहेंलो-हरियो वा सेतो दूधजस्तो पानी बग्नु

– योनीबाट कडा गन्ध आउनु

– पिसाब गर्दा दुखाइ र असहज महसुस हुनु

– यौन सम्बन्ध राख्दा पीडा हुनु

– योनी चिलाउनु र यसको क्षेत्र सुन्निनु

पुरुषमा देखिने लक्षण

– बिहान पिसाब पहिलो पटक गर्दा लिङ्गबाट स्राब हुनु

– लिङ्गको टुप्पो वा मूत्रद्वार वरपर चिलाउनु

– यौन सम्पर्क गर्दा र वीर्य झर्दा दुख्नु

– पिसाब गर्दा दुख्ने र आफैं ठीक हुनु

ट्राइकोमोनियासिमा देखिने यस्ता लक्षण आफैं ठीक हुँदैनन् । यो समस्या भए तुरुन्त परीक्षण गराउने र आफ्नो यौन साथीलाई पनि खुलेर भन्न सकिन्छ ।

यो पनि पढ्नुहोस

यौनरोगलाई सामान्य रुपमा लिनुहुँदैन (भिडियो)

पहिचान

महिलामा योनीभित्रको तरल पदार्थ,र पिसाबको नमुना लिन सकिन्छ । योनीस्राबको नमुना लिई माइक्रो स्कोप, कल्चर र डीएनए परीक्षणबाट पनि पत्ता लाग्छ । नियमित पाठेघरको मुखको परीक्षण गर्दा पनि यो रोगको पहिचान हुनसक्छ ।

पुरुषमा मूत्रनलीबाट तरल पदार्थको नमुना लिइन्छ ।

उपचार

यो संक्रमणको पत्ता लागेमा खाने औषधिले पनि निको पार्छ । औषधिमा ‘मेटोनिडाजोल’ वा ‘टाइनिडाजोल एन्टिबायोटिक्स’ लिन सकिन्छ, जुन चिकित्सकको सल्लाहमा मात्र खानुपर्छ । यी औषधिले संक्रमणलाई रोक्न सक्छ ।

जबसम्म उपचार पूरा हुँदैन । तबसम्म यौनसम्बन्ध नबनाउन सल्लाह दिइन्छ । यसको उपचार नभएमा यो महिनौं र वषौंसम्म रहिरहन सक्छ ।

उपचार नभएमा

यदि समयमा उपचार भएन भने यसले अन्य यौन प्रसारित रोगको जोखिम गराउन सक्छ । गर्भावस्थामा यो समस्या भएमा डाक्टरले तोकेको प्रसव मिति अगावै सन्तान जन्मिने, कम तौलको हुनसक्ने र उनीहरूमा पनि यसको संक्रमण हुने सम्भावना हुन्छ ।

त्यस्तै, उपचार नभएमा यौनाङ्गबाट गन्हाउने खालको तरल पदार्थ बग्ने, सुन्निने र रातोपन भइराख्ने हुनसक्छ ।

कसरी बच्ने ?

– यौन सम्बन्ध राख्दा कण्डमको प्रयोग गर्ने

– असामान्य स्राव, घाउ र पिसाब गर्दा दुखाइ भएमा यौन सञ्चारित रोगको परीक्षण गराउने

– वर्षमा एक पटक पाठेघरको लागि जाँच गराउँदा यौन सञ्चारित रोगको पनि परीक्षण गराउने ।

यो पनि पढ्नुहोस

यौनरोग के हो र कसरी सर्छ ? (भिडियो)