कृष्णमानलाई एमाले सांसदको प्रश्न : यौन शोषण आरोपको वास्तविकता के हो ?

९ साउन, काठमाडौं । निर्वाचन आयोगका लागि प्रस्तावित आयुक्त कृष्णमान प्रधानको संसदीय सुनुवाइ जारी छ । प्रधानको कार्यायोजना सुनेर सांसदहरुले प्रश्नोत्तर सुरु गरेका छन् ।

प्रस्तावित आयुक्त प्रधानलाई सांसदहरुले उनीमाथि लागेको यौन शोषणको आरोपबारे प्रश्न गरिरहेका छन् ।

नेकपा एमालेकी सांसद ईश्वरी घर्तीले ‘सन् २०१७ देखि २०२३ सम्म एकजना महिलासँग सम्बन्ध भएको, त्यो सम्बन्ध राम्रोबाट सुरु भएर लेनदेनमा पुगेर टुंगिएको देखिएको’ बताइन् । यसको वास्तविकता के हो ? भन्ने प्रधानलाई एमाले सांसद घर्तीको प्रश्न छ ।

निर्वाचन आयुक्त पद जिम्मेवारीयुक्त पद भएको उल्लेख गर्दै उनले उच्च नैतिक चरित्र नभएको व्यक्ति आयुक्त बन्न नसक्ने संवैधानिक व्यवस्था रहेको स्मरण गराइन् ।

संविधानको धारा २४५ को ६ को घ मा उच्च नैतिक चरित्र भएको हुनुपर्ने व्यवस्था रहेको उल्लेख गर्दै उनले थपिन्, ‘तपाईमाथि लागेको आरोपलाई आधार मान्ने हो भने तपाईं प्रस्तावित पदका लागि अयोग्य हुनुहुन्छ ।’