जनमतकी सांसद सापकोटालाई पदबाट हटाउन सभामुखले चौथोपटक पनि गरे इन्कार

७ मंसिर, काठमाडौं । सभामुख देवराज घिमिरेले जनमत पार्टीकी समानुपातिक सांसद गोमा लाभ (सापकोटा)लाई पदबाट हटाउन चौथोपटक पनि इन्कार गरेका छन् ।

जनमत पार्टीले पेस गरेका ‘डकुमेन्ट विश्वसनीय नभएको’ भन्दै सभामुख घिमिरेले सांसद सापकोटालाई नहटाउने निर्णय गरेका हुन् ।

जनमत पार्टीले अनुशासन विपरीतको काम गरेको भन्दै सापकोटालाई कारबाहीको निर्णय गरेको थियो । साथै पार्टीले कारबाही गरिसकेको भन्दै सांसद पदबाट पनि हटाउन माग गर्दै जनमत पार्टीका संसदीय दलका नेता सीके राउतले सभामुखलाई पत्र पठाएका थिए ।

तर सभामुख घिमिरेले आज कम्बोडिया जानुअघि सांसद सापकोटालाई कारबाही नगर्ने निर्णय गरेका हुन् । सभामुख घिमिरेका प्रेस विज्ञ शेखर अधिकारीले भने, ‘जनमत पार्टीले जुन डकुमेन्ट पेस गरेको छ, त्यो नमिलेकाले सूचना टाँस गर्नुपरेन ।’

सापकोटालाई पदबाट हटाइएको सूचना सभामुखले टाँस गर्नुपर्ने मागसहित जनमत पार्टीले पहिलो पटक २७ फागुन २०८०, दोस्रोपटक १ चैत २०८०, तेस्रोपटक २७ भदौ २०८१ र चौथोपटक यही कात्तिक २७ गते संसद सचिवालयमा निवेदन दिएको थियो ।

सांसद सापकोटाले भने आफूले गलत गरेको प्रमाणित गरेर देखाउन सीके राउतलाई चुनौती दिएकी छन् ।

यो पनि पढ्नुहोस

आफ्नै सांसद हटाउन सीके राउतको मरिहत्ते