ट्रम्पले गरे यूएसएआईडीका कर्मचारी निलम्बन, मस्कले के भने ?

२१ माघ, काठमाडौं । अमेरिकी राष्ट्रपति डोनाल्ड ट्रम्पले अमेरिकी अन्तर्राष्ट्रिय विकास नियोग (यूएसएआईडी) का कर्मचारीलाई निलम्बन गरेका छन् । उनले यूएसएआईडीका दुई उच्च अधिकारीसहित धेरै कर्मचारीहरूलाई निलम्बित गरेका हुन् ।

निलम्बनमा पर्नेमा एजेन्सीका निर्देशक जोन वूर्हीज र उपनिर्देशक ब्रायन म्याकगिललगायत छन् ।  उनीहरूको इलन मस्क नेतृत्वको गभर्मेन्ट एफिसिएन्सी डिपार्टमेन्टका कर्मचारीसँग यूएसएआईडी सिस्टममा पहुँचको विषयमा विवाद भएको थियो ।

डिपार्टमेन्टका कर्मचारीले सिस्टममा पहुँच दिन आग्रह गरे पनि यूएसएआईडीका अधिकारीहरूले अनुमति दिन नमानेपछि विवाद भएको हो ।

डिपार्टमेन्टका कर्मचारीहरूले यूएसएआईडीको मुख्यालयमा जबरजस्ती प्रवेश गर्ने प्रयास गरेका थिए । उनीहरूले सिस्टममा पहुँच नदिए सुरक्षा अधिकारीलाई बोलाउने धम्कीसमेत दिएका थिए ।

यो पनि पढ्नुहोस

अमेरिकी संघीय अनुदान र ऋण सहायता रोक्ने ट्रम्पको निर्णय स्थगित

विवादका बीच उनीहरू यूएसएआईडीको केन्द्रीय कार्यालयमा प्रवेश गरेका थिए ।

गभर्मेन्ट एफिसिएन्सी डिपार्टमेन्टका कर्मचारीहरू बिना अनुमति यूएसएआईडीको संवेदनशील स्थानहरूमा प्रवेश गरेको दाबी सीएनएनले गरेको छ । उनीहरूले नागरिकको गोप्य सूचना समेत संकलन गरेका थिए ।

गभर्मेन्ट एफिसिएन्सी डिपार्टमेन्टकी एक कर्मचारी कैटी मिलरले भने गोप्य सामग्रीमा बिना अनुमति पहुँच नगरिएको स्पष्ट पारेकी छन् ।

यसैबीच, इलन मस्कले एक्समा लेखेका छन्, ‘यूएसएआईडी एक आपराधिक संगठन हो, अब यसलाई बन्द गर्ने समय आइसकेको छ ।’

यो पनि पढ्नुहोस

अमेरिकी सहयोग रोकिँदा स्वास्थ्यका कार्यक्रममा कस्तो असर पर्छ ?

अहिले यूएसएआईडीको वेबसाइड बन्द गरिएको छ ।

शनिबार यूएसएआईडीको आधिकारी वेबसाइट र सामाजिक सञ्जाल अकाउन्टहरू बन्द गरिएका हुन् । अमेरिकी राष्ट्रपति डोनाल्ड ट्रम्पले २० जनवरीमा शपथ लिएपछि विदेशमा जाने सबैप्रकारका सहायता ९० दिनका लागि रोक्ने आदेश दिएका थिए । उनले यससम्बन्धी कार्यकारी आदेशमा हस्ताक्षर गरिसकेका छन् ।

यूएसएआईडीले विभिन्न देशका सरकारी, गैरसरकारी र निजी संस्थासँगै स्थानीय समुदायहरूसँग पनि मिलेर काम गर्दै आएको छ । संस्थालाई अमेरिकी संसदबाट रकम प्राप्त हुन्छ ।

कंग्रेसको एउटा ऐनद्वारा स्थापित स्वतन्त्र एजेन्सी युएसएआइडीले विश्वभर मानवीय राहत र विकास सहायताका लागि ४२ अर्ब ८० करोड डलरको बजेट व्यवस्थापन गर्दछ । यसले स्वास्थ्य, शिक्षा, आर्थिक विकास, लोकतन्त्र, सुशासन र विपद् व्यवस्थापनको क्षेत्रमा सहयोग प्रदान गर्दै आएको छ ।

संसारका झन्डै १०० देशमा यूएसएआईडीले काम गर्दै आएको छ । यीमध्ये पनि अफ्रिका, एशिया, ल्याटिन अमेरिका र मध्ये पूर्वमा यसले आफ्नो सहयोगलाई केन्द्रित गर्दै आएको छ । यसको उद्देश्य अमेरिकी विदेश नीतिलाई अगाडि बढाउनु रहेको छ ।

यो पनि पढ्नुहोस

अनुदान रोक्ने ट्रम्प घोषणाले एमसीसी प्रभावित नहुने

उनले अर्बपति मस्कप्रति आफ्नो समर्थनलाई जोड दिँदै आइतबार राति पत्रकारहरूलाई भने, ‘मैले मस्कले राम्रो काम गरिरहेको महसुस गरेँ ।’ ट्रम्प यूएसएआईडीलाई विदेश विभागमा राख्न चाहेका छन् भन्ने पनि खबर आएको छ ।