अध्यादेशबारे जसपा नेपालसँग कुरा भइराखेको छ : बेदुराम भुसाल

२२ माघ, काठमाडौं । नेकपा एकीकृत समाजवादीका वरिष्ठ उपाध्यक्ष बेदुराम भुसालले अध्यादेशबारे जनता समाजवादी पार्टी नेपालसँग कुरा भइराखेको बताएका छन् ।

आगामी बिहीबार प्रतिनिधिसभा र राष्ट्रिय सभामा सरकारले ल्याएका ६ वटा अध्यादेश निर्णयार्थ पेस हुँदैछ । एकीकृत समाजवादी, नेकपा माओवादीसहित विपक्षमा रहेका दलका सांसदले अध्यादेश अस्वीकृत गर्ने सूचना संसद सचिवालयलाई दिएका छन् । तर, जनता समाजवादी पार्टी नेपालले यो विषयमा निर्णय लिएको छैन ।

राष्ट्रिय सभामा रहेको अंकगणित समेतका आधारमा विपक्षी दलहरूले जसपा नेपालसँग कुरा गरिराखेको भुसालले जानकारी दिए । ‘अध्यादेशबारे जसपा नेपालका नेताहरूसँग कुरा भइराखेको छ । उहाँहरू पनि छलफलमै हुनुहुन्छ,’ उनले अनलाइनखबरसँग भने ।

जसपा नेपालले अध्यादेशबारे निर्णय लिन कार्यदल गठन गरेको छ । राजकिशोर यादवको नेतृत्वमा गठित कार्यदलको बैठक मंगलबार सिंहदरबारमा बसेको थियो । मंगलबार विज्ञहरूसँग छलफल गरेको कार्यदलको बैठक बुधबार पनि बस्दैछ ।

नेताहरूका अनुसार जसपा नेपालको संसदीय दलको बैठक बिहीबार बिहान बोलाएको छ । संसदीय दलको बैठकबाटै अध्यादेशबारे निर्णय लिने तयारी जसपा नेपालको छ ।