हेटौंडा उपमहानगरको फोहोर संकलन गर्न उच्च अदालतले रोक्यो

२४ माघ, हेटौंडा । हेटौंडा उपमहानगरपालिकाले नगर क्षेत्रबाट फोहोर संकलन र फोहोरको व्यवस्थापन कार्य स्थगन गरेको छ ।

उच्च अदालत पाटन हेटौंडा इजलासले  हेटौडा-१० राप्ती खोला तटमा बनाइएको डम्पिङ साइटमा फोहोर नफाल्न र फोहोर नफाल्न हेटौंडा उपमहानगरको नाममा अल्पकालीन अन्तरिम आदेश जारी भएपछि संकलन र व्यवस्थापन कार्यमा रोक लागेको हो ।

योगेन्द्रप्रसाद उपाध्यायले हेटौंडा उपमहानगरपालिकालाई विपक्षी बनाएर दायर गरेक निषेधाज्ञा मुद्दामा न्यायाधीश डा. निर्मला पौडेल भट्टराईको एकल इजलासले २२ माघमा राप्ती टलमा फोहोर फाल्न रोक लगाउन अल्पकालीन अन्तरिम आदेश जारी गरेको हो ।

‘हेटौंडा-१० स्थित गोरक्षश्वर मन्दिर भन्दा दक्षिणतर्फ राप्ती खोलाको तटमा फोहोर नफाल्नू, फोहोर फाल्न नलगाउनू भनी अल्पकालीन अन्तरिम आदेश जारी गरिदिएको छ´, आदेशमा भनिएको छ । दुवै पक्षलाई २९ माघमा छलफलका लागि बोलाइएको छ ।

हेटौंडामा विगत लामो समयदेखि निजी संस्था ग्रिन एन्ड क्लिन सिटी सभिर्सेजमार्फत फोहोरको नियमित संकलन तथा हेटौंडा-१० राप्ती तटमा डम्पिङ साइट बनाएर फोहोरको व्यवस्थापन हुँदै आएको थियो ।

केही दिन अगाडि डम्पिङ साइटमा आगलागी भएर प्रदूषणले १० र ११ नम्बर वडाबासी प्रभावित बनेको भन्दै यो विषय अदालतसम्म पुगेको हो। स्थानीयले डम्पिङ साइटमा पटक-पटक आगलागी गराएर नागरिकको स्वास्थ्य संवेदनशीलतामा ध्यान नदिएको गुनासो गर्दै आएका छन् ।