राष्ट्रिय लोकतान्त्रिक अपाङ्‍ग संघका नवनिर्वाचित कार्यसमितिलाई देउवाको बधाई

काठमाडौं । नेपाली कांग्रेसका सभापति शेरबहादुर देउवाले राष्ट्रिय लोकतान्त्रिक अपाङ्‍ग संघका नवनिर्वाचित कार्यसमितिलाई बधाई तथा शुभकामना दिएका छन् ।

पार्टी केन्द्रीय कार्यालय सानेपामा संघका नवनिर्वाचित अध्यक्ष माधवप्रसाद चम्लागाईंसहितका पदाधिकारी तथा सदस्यहरूलाई बोलाएर देउवाले लोकतन्त्रको रक्षाका लागि अपाङ्‍गता भएका व्यक्तिहरूले दिएको योगदानलाई बोध गरेर अघि बढ्न निर्देशन समेत दिए ।

`लोकतन्त्रको लागि अपाङ्‍गता भएका व्यक्तिहरूको ठूलो योगदान छ, त्यसलाई बुझेर उत्साहका साथ तपाईंहरू अघि बढ्नोस, लोकतन्त्रको रक्षाका लागि लागिरहनुस्,´ देउवाले भने।

सभापति देउवाले कुनै पनि कारणले अपाङ्गता भएको भए पनि अपाङ्ग छु भन्ने नठानी उत्साहका साथ अघि बढ्नसमेत आग्रह गरे।

कार्यक्रममा नवनिर्वाचित कार्यसमितिका पदाधिकारी, सदस्यसहित निवर्तमान अध्यक्ष प्रकाश पन्त र संस्थापक अध्यक्ष भोजराज श्रेष्ठसमेत सहभागी थिए।

यस्तै बिहीबार नै कांग्रेस महामन्त्री विश्वप्रकाश शर्मालेसमेत नवनिर्वाचित कार्यसमितिका अध्यक्षसहित पदाधिकारी तथा सदस्यहरुलाई बधाईं तथा शुभकामना दिएका छन।