शिक्षक आन्दोलनको असर : हिउँदे वा वर्षे बिदामा कक्षा सञ्चालन

Quick Summary

AI-generated by OK AI. Editorially reviewed.

शिक्षक आन्दोलनका कारण विद्यार्थीको पढाइ प्रभावित भएको थियो र अब बिदामा परिपूर्ति गरिने भएको छ।
नेपाल शिक्षक महासंघले अनुकूलता अनुसार हिउँदे वा वर्षे बिदामा पठनपाठन सञ्चालन गर्न निर्देशन दिएको छ।
भर्ना अभियान र पठनपाठनको कार्यलाई प्रभाव नपरोस् भनेर आवश्यक तयारी भइरहेको छ।

२६ वैशाख, काठमाडौं । शिक्षक आन्दोलनका कारण प्रभावित भएको विद्यार्थीको पढाइ बिदामा परिपूरण गरिने भएको छ । नेपाल शिक्षक महासंघले आफ्नो अनुकूलता अनुसार हिउँदे वा वर्षे बिदामा पठनपाठन सञ्चालन गर्न निर्देशन दिएको छ ।

‘आन्दोलनका क्रममा आयोजना भएको आम शैक्षिक हडतालका कारण विद्यालयको भर्ना र पठनपाठन अबरुद्ध हुन गएको छ । विद्यार्थी वर्गमा पर्न गएको शिक्षण सिकाइको क्षतिलाई ध्यानमा राखी आफ्नो अनुकूलता अनुसार हिउँदे वा वर्षे विदामा पठनपाठन सञ्चालन गर्न भनेका छौं,’ महासंघ अध्यक्ष लक्ष्मीकिशोर सुवेदीले भने । ४५ दिन बिदा हुने भएकाले कति क्षति भएको छ सोही अनुसार कक्षा सञ्चालन गर्न महासंघले भनेको छ ।

‘कुनै ठाउँमा हिउँदे बिदा हुन्छ । कुनै ठाउँमा वर्षे बिदा हुन्छ । दैसैं र तिहारमा पनि बिदा हुन्छ । अनुकूलता हेरेर कक्षा सञ्चालन गर्न निर्देशन दिएका हौं,’ अध्यक्ष सुवेदीले भने ।

शिक्षक महासंघले गत २० चैतदेखि २९ दिन काठमाडौंमा सडक आन्दोलन गरेको थियो । विद्यालय शिक्षा ऐन जारी गर्न माग गर्दै शिक्षकहरूले शैक्षिक हड्ताल गर्दा पठनपाठन प्रभावित भएको थियो । सरकार र महासंघबीच १७ वैशाखमा ९ बुँदे सहमति भएपछि आन्दोलन रोकिएको हो ।

१ वैशाखदेखि नयाँ शैक्षिकसत्र सुरु भए पनि शिक्षकको हड्तालको कारण भर्ना अभियानसमेत प्रभावित भएको थियो । शिक्षा तथा मानव स्रोत विकास केन्द्रका अनुसार अहिले भर्ना अभियान चलिरहेको छ । साथै विद्यार्थीको हात हातमा किताब पुर्‍याउने काम पनि भइरहेको छ । ‘सबै ठाउँमा पुस्तक पुगिसकेको छ । कतै पनि अभाव छैन । आवश्यकताअनुसार विद्यार्थीको हातहातमा पुस्तक पुर्‍याउने काम भइरहेको छ,’ जनक शिक्षाका प्रबन्ध सञ्चालक यदुनाथ पौडेलले भने ।