बीपी प्रतिष्ठानमा ३५ लाख अपचलन

News Summary

Generated by OK AI. Editorially reviewed.

धरानस्थित बीपी कोइराला स्वास्थ्य विज्ञान प्रतिष्ठानबाट ३५ लाख ८७ हजार रुपैयाँको अपचलन भएको पाइएको छ।
महालेखा परीक्षकको प्रतिवेदनले सफ्टवेयर र बैंक कर्मचारीको मिलेमतोमा रकम हिनामिना भएको देखाएको छ।
महालेखाले थप अनुसन्धानको आवश्यकता औंल्याएको छ।

३१ वैशाख, काठमाडौं । धरानस्थित बीपी कोइराला स्वास्थ्य विज्ञान प्रतिष्ठानबाट सफ्टवेयर र बैंकका कर्मचारीको मिलेमतोमा ३५ लाख ८७ हजार रुपैयाँ अपचलन भएको पाइएको छ ।

महालेखा परीक्षकको ६२औं प्रतिवेदनमा मिडास सफ्टवेयर सञ्चालनमा संलग्न कर्मचारी र सनराइज बैंकका कर्मचारीको मिलेमतोमा रकम हिनामिना भएको उल्लेख छ ।

प्रतिवेदनले रकम अपचलन भएको विषयमा प्रतिष्ठानले गठन गरेको छानबिन समितिले नै देखाउँदा पनि आवश्यक कारबाही नगरेको जनाएको छ ।

प्रतिवेदनमा भनिएको छ,‘प्रतिष्ठानले आय संकलनका लागि मिडास सफ्टवेयर प्रयोगमा ल्याएको र सफ्टवेयरअनुसार प्राप्त देखिएको रकम बैंक दाखिला नभएको सम्बन्धमा ३ सदस्यीय छानबिन समिति गठन गरेको पाइयो । उक्त समितिको प्रतिवेदनमा सफ्टवेयर सञ्चालनमा संलग्न कर्मचारी र सनराइज बैंकको कर्मचारीको मिलेमतोमा रकम हिनामिना भएको ठहरसहित सफ्टवेयर कम्पनीले ३५ लाख ८७ हजार अपचलन गरेको उल्लेख छ ।’

लेखापरीक्षण प्रतिवेदनबाट उक्त विषय औंल्याइए पश्चात् उक्त रकम बैंकमा दाखिला गरेको प्रमाण पेस गरेता पनि थप छानबिन भने गरिएको छैन ।

प्रचलित कानुन बमोजिम छानबिन गरी आवश्यक कारबाही गर्ने महालेखाले सुझाव दिएको छ ।

प्रतिष्ठानबाट यस वर्षको अस्पताल सेवा सञ्चालनको आय १ अर्ब ३६ करोड २३ लाख ६१ हजार रहेको छ ।