२०८२ जेठ २ गते १७:४१ 
२ जेठ, काठमाडौं । नेपाल साफ यू-१९ च्याम्पियनसिप फुटबलको सेमिफाइनलबाटै बाहिरिएको छ । साविक विजेता बंगलादेशसँग नेपाल २-१ ले पराजित हुँदै बाहिरिएको हो ।
पहिलो हाफ गोलरहित बराबरीमा सकिए पनि नेपालले दोस्रो हाफमा दुई गोल बेहोरेको हो ।
युपियास्थित गोल्डेन जुब्ली स्टेडियममा भएको खेलमा बंगलादेशका लागि असिकुर रहमान र मोहम्म जोए अहमदले गोल गरे । नेपालका लागि सुजन डंगोलले एक गोल फर्काए ।
असिकुर रहमानले ७३औं मिनेटमा गोल गर्दै बंगलादेशलाई अग्रता दिलाएका थिए । मोहम्मद जोए अहमदले ८१औं मिनेटमा गोल गर्दै बंगलादेशको अग्रता दोब्बर पारे ।
८७औं मिनेटमा सुजन डंगोलले गोल गर्दै नेपाललाई खेलमा फर्काउने प्रयास गरेका थिए । तर त्यसपछि गोल थप्न नसक्दा नेपाल सेमिफाइनलबाटै बाहिरियो ।
उपाधि जित्ने लक्ष्यसहित भारत पुगेपनि नेपालले यस पटक फाइनलमा समेत स्थान बनाउन सकेन ।
गत वर्ष घरेलु मैदानमा भएको साफ यू-२० च्याम्पियनसिपको फाइनलमा नेपाल बंगलादेशसँगै पराजित हुँदा उपविजेता बनेको थियो ।
बंगलादेशले अब उपाधिका लागि आजै हुने भारत खर माल्दिभ्सबीचको विजेतासँग फाइनल खेल्नेछ ।
प्रतिक्रिया 4