हुम्ला पहिरो पीडितको उद्धारका लागि सभामुखसँग रुलिङ माग

News Summary

Generated by OK AI. Editorially reviewed.

राप्रपा सांसद ज्ञानेन्द्रबहादुर शाहीले हुम्लाको हिमपहिरो पीडितहरूको उद्धार गर्न सरकारको चासो नदेखिएको आरोप लगाए।
सांसद शाहीले हिमपहिरो पीडितहरूको उद्धारका लागि सभामुखले रुलिङ गर्न आवश्यक रहेको बताए।
उनले कर्णालीलाई अलग गर्न र सरकारको हेलिकप्टरको व्यवस्था गर्न आग्रह गरे।

६ जेठ, काठमाडौं । राष्ट्रिय प्रजातन्त्र पार्टी (राप्रपा) सांसद ज्ञानेन्द्रबहादुर शाहीले हुम्लाको हिमपहिरो पीडित अलपत्र अवस्थामा रहेको भन्दै उनीहरूको उद्धारका लागि सभामुखसँग रुलिङको माग गरेका छन् ।

मंगलबार प्रतिनिधिसभाको बैठकमा बोल्दै सांसद शाहीले हिमपहिरोमा जनता अलपत्र अवस्थामा रहे पनि सरकारले उद्धारमा चासो नदेखाएको टिप्पणी गरे ।

कर्णालीका जनता पनि यही देशका नागरिक भएको भन्दै उनले हिमपहिरो पीडितहरूको उद्धारका लागि सभामुखले रुलिङ गर्नु आवश्यक रहेको बताए ।

उनले भने, ‘हुम्लाको नाम्खा गाउँपालिका-६ स्थित तिलागाउँमा हिमपहिरो गएको छ । अहिलेसम्म सरकारले उद्धार गरेको छैन । सरकारलाई म भन्न चाहन्छु । सरकारको दिमागमा जाम लाग्यो कि क्या हो ? कि आँखामा रत्तन्धो लाग्यो ? कि कानमा ढुसी पर्‍यो ? कि हेलिकप्टरमा खिया लाग्यो ? मन्त्रीहरूको सवारी हुँदा सरकारको हेलिकप्टर घुमेको घुमै हुने । हुम्लामा हिमपहिरो हिमताल फुटेर जनताहरू रोइरहेका छन् । एउटा हेलिकप्टर पठाउन सकेको छैन यो सरकारले । कि कर्णालीलाई हेपेको हो ?’

सांसद शाहीले अगाडि भने, ‘कर्णालीलाई हेपेको हो भने म सिधा भन्न चाहन्छु, म निर्वाचित सांसद हुँ कर्णालीबाट । तपाईं कर्णालीलाई अलग बनाउनुस् । तपाईंको राज्य व्यवस्था अन्तै सार्नुस् । हामी चलाएर देखाउँछौं ।’

राज्यमन्त्री घुम्दा हेलिकप्टर लगेर घुम्ने गरेको भए पनि हिमपहिरोमा फसेकाहरूको उद्धारका लागि हेलिकप्टरको व्यवस्था गर्न नसकेकोमा सरकारको आलोचना गरे ।

उनले हालै सम्पन्न सगरमाथा संवाद कार्यक्रमप्रति पनि तिखो टिप्पणी गरे । उनले भने, ‘ सगरमाथा संवाद के-को संवाद ? कहाँको संवाद ? कताको संवाद ? हिमपहिरोले मान्छे मरिरहेका छन् । त्यता उद्धार छैन । यहाँको नाटकबाजी ।’