शाकाहारी संघले काठमाडौंमा तीनदिने अहिंसा महोत्सव आयोजना गर्दै

News Summary

Generated by OK AI. Editorially reviewed.

नेपाल शाकाहारी संघले महोत्सव भदौ १२ देखि १४ गतेसम्म अहिंसा महोत्सव नेपाल सम्मेलन आयोजना गर्दै ।
सम्मेलनमा लगभग ३० हजार सहभागीको अपेक्षा गरिएको छ र ६० भन्दा बढी कक्ष, ४० भन्दा बढी वक्ता र २० भन्दा बढी संस्था सहभागी हुनेछन्।

६ जेठ, काठमाडौं । नेपाल शाकाहारी संघले करुणा, अहिंसा र पशु अधिकारको प्रवर्द्धन गर्ने उद्देश्यले ‘अहिंसा महोत्सव नेपाल’ आयोजना गर्ने भएको छ । आगामी भदौ १२ देखि १४ गतेसम्म प्रदर्शनीमार्गस्थित नेपाल पुलिस क्लबमा महोत्सव आयोजना गर्न लागिएको नेपाल शाकाहारी संघका अध्यक्ष कृष्ण गुरुङले जानकारी दिए ।

गुरुङका अनुसार महोत्सव अवधिभर सबैका लागि निःशुल्क प्रवेशको व्यवस्था गरिएको छ । ‘करुणाले जोड्छ’ भन्ने नाराका साथ आयोजना गरिने महोत्सवले पशुपंक्षी, मानव स्वास्थ्य र वातावरणको हितका लागि ‘पूर्ण शाकहारी’ जीवनशैली अपनाउन प्रेरित गर्ने विश्वास आयोजकको छ ।

अहिंसाका मूल्य र शाकहारी जीवनशैलीमा रुचि राख्ने सबैमा समर्पित महोत्सवले पशुमुक्ति अभियन्ता, संघ-संस्था र समुदायबीच सम्बन्ध र सहकार्यको पुल बन्ने उद्देश्य पनि राखेको अध्यक्ष गुरुङले बताए ।

उनका अनुसार महोत्सवका प्रमुख आकर्षणमा दिगो जीवन पद्धति, शाकहारी जीवनशैली र पशु अधिकारसम्बन्धी अन्तरक्रिया, साङ्गीतिक प्रस्तुति, योग सत्र समेत रहनेछ । साथै देशविदेशका अभियन्तासँग प्रत्यक्ष भेटघाट र अनुभव आदानप्रदान, शाकाहारी परिकार तथा पकाउने विधिको प्रदर्शन र विशेष रात्रिभोज समेत महोत्सवमा रहनेछन् ।

महोत्सवमा ३० हजारभन्दा बढी सहभागी हुने अपेक्षा गरिएको अध्यक्ष गुरुङले उल्लेख गरे । उनका अनुसार महोत्सवमा शाकहारी उत्पादनका ६० भन्दा बढी कक्ष, ४० भन्दा बढी वक्ता र २० भन्दा बढी सहभागी संस्था रहनेछन् ।

संघले यसअघि २०७४ सालमा काठमाडौँमा ३५ भन्दा बढी अन्तर्राष्ट्रिय प्रतिनिधिको सहभागितामा आठौँ एसिया–प्यासिफिक भेजिटेरियन कांग्रेस (एपिभिसी) को आयोजना गरेको थियो । उक्त सफलतालाई निरन्तरता दिँदै महोत्सव आयोजना गर्न लागिएको गुरुङले बताए ।