इलाममा बालचलचित्र महोत्सव सुरु (तस्वीर)

News Summary

Generated by OK AI. Editorially reviewed.

मंगलबारदेखि इलाममा ‘बालचलचित्र महोत्सव’ सुरु भएको छ, जुन जेठ १० सम्म चल्नेछ।
महोत्सवको उद्घाटन गर्दै चलचित्र विकास बोर्डका अध्यक्ष दिनेश डीसीले यसलाई सकारात्मक प्रयास भने।
इलाम नगरपालिका र चलचित्र बोर्डको सहकार्यमा आयोजित महोत्सवमा बालबालिकालाई चलचित्र निर्माण तालिम दिइएको छ।

इलाम । चलचित्र क्षेत्रमा रुची राख्ने र यसमा भविष्य बनाउन चाहने बालबालिकालाई लक्षित गर्दै मंगलबारदेखि यहाँ ‘बालचलचित्र महोत्सव’ सुरु भएको छ । महोत्सव जेठ १० गतेसम्म जारी रहनेछ ।

महोत्सव उद्घाटन गर्दै चलचित्र विकास बोर्डका अध्यक्ष दिनेश डीसीले गृहथलोमा यस किसिमको महोत्सव आयोजना हुनु आफैमा सकारात्मक र सार्थक प्रयास भएको बताए ।

इलाम नगरपालिका र चलचित्र बोर्डको सहकार्यमा आयोजित महोत्सवको पाँच दिनसम्म विभिन्न कार्यक्रम राखिएका छन् । त्यस अन्र्तगत सेलिब्रेटीसँग बालबालिकाको साक्षात्कार गराइनेछ । साथै, बालचलचित्र पनि प्रदर्शन गरिनेछ । बालचलचित्र निर्माणसम्बन्धी प्रशिक्षणसमेत दिइने महोत्सवमा चलचित्रका विभिन्न गतिविधि सञ्चालन हुनेछन् ।

इलाम नगरपालिकाको सभाहलमा सञ्चालित महोत्सवको पहिलो दिन ३५ जना बालबालिकालाई चलचित्र निर्माणबारे तालिम दिइएको थियो । निर्देशक तथा निर्माता बद्री अधिकारीले तालिमको सहजीकरण गरेका थिए भने संयोजन कोशी प्रदेश चलचित्रकर्मी संघका अध्यक्ष केवल तामाङले गरे ।

कार्यक्रम उद्घाटन इलाम नगरपालिकाकी उपप्रमुख विष्णु दाहालले गरेकी थिइन् ।

जिल्लामा रहेका विद्यालय, बालक्लब, बाल समुदायबाट समावेशी प्रतिनिधित्व हुने गरि कार्यशाला आयोजना गरिएको हो । कार्यशालामा कक्षा ७ देखि ९ सम्म अध्ययनरत १५ वर्ष मूनिका बालबालिका सहभागी छन् ।

निर्देशक अधिकारीसहित लेखन, छायांकन, सम्पादन र संगीत विधाका ३ जनाले प्रशिक्षण दिनेछन् । नेपाली चलचित्रको विकास, विस्तार र प्रवद्र्धन, चलचित्र साक्षरता अभिवृद्धि, दक्ष चलचित्रकर्मी उत्पादन एवं बालबालिकालाई आफ्ना कथा भन्ने र हेर्ने वातावरण सिर्जना गर्नका लागि कार्यशाला आयोजना गरिएको जनाइएको छ ।