रास्वपाको चिन्ता- अदालतबाट न्याय पाइन्छ भन्ने जनविश्वास कमजोर नबनोस्

रास्वपा सचिवालय बैठक (फाइल तस्वीर)

News Summary

Generated by OK AI. Editorially reviewed.

रास्वपा ले सर्वोच्च अदालतको आदेशलाई स्वीकार गर्दै राजनीतिक प्रतिशोधको आशङ्का व्यक्त गरेको छ।
पार्टीले अदालतबाट न्याय पाइन्छ भन्ने जनविश्वास कमजोर नबनोस् भन्ने चिन्ता व्यक्त गरेको छ।
भोलि दिउँसो २ बजे पार्टी केन्द्रीय कार्यालयमा बैठक बस्ने निर्णय भएको छ।

१० जेठ, काठमाडौं । राष्ट्रिय स्वतन्त्र पार्टी (रास्वपा) ले अदालतबाट न्याय पाइन्छ भन्ने जनविश्वास कमजोर नबनोस् भन्नेतर्फ आफ्नो पार्टीको चिन्ता रहेको बताएको छ ।

पार्टी सभापति रवि लामिछानेको बन्दी प्रत्यक्षीकरण रिटमा शुक्रबार सर्वोच्च अदालतबाट जारी आदेशलाई स्वीकार गर्ने बताउँदै रास्वपाले राजनीतिक प्रतिशोध र राज्यले अनावश्यक पीडा दिइरहेको बताएको छ ।

सभापति लामिछानेको आदेश लगत्तै रास्वपाले शुक्रबार राति नै आकस्मिक सचिवालय बैठक राखेको थियो । उक्त बैठकपछि शनिबार बसेको आकस्मिक केन्द्रीय समिति बैठकले तथ्यहीन तर्कको आधारमा निर्णय भएछ कि भन्ने आशङ्काको यथेष्ट सम्भावना रहेकोमा चिन्ता व्यक्त गरेको छ ।

‘तर सहकारीको बोर्डमा रहेका, सहकारी बचतकर्ताको अर्बौं रकम अपचलनमा संलग्नलाई गरिएको व्यवहार र कम्पनी ऐन अनुसार हेरिनुपर्ने मुद्दालाई जबरजस्ती सहकारीसँग जोडिएर आधारहीन, तथ्यहीन तर्कको आधारमा निर्णय भएछ कि भन्ने आशङ्काको यथेष्ट सम्भावना रहेकोमा हाम्रो सरोकार र चिन्ता रहेको छ,’ कार्यबाहक प्रवक्ता मनीष झाले जारी गरेको विज्ञप्तिमा भनिएको छ, ‘राजनीतिक प्रतिशोध र राज्यले अनावश्यक पीडा दिइरहँदा अदालतबाट न्याय पाइन्छ भने जनविश्वास कमजोर नबनोस् भन्नेप्रति समेत चिन्ता व्यक्त गर्दछौं ।’

रास्वपाले भोलि दिउँसो २ बजे पुनः पार्टी केन्द्रीय कार्यालयमा केन्द्रीय समितिको बैठक बस्ने पनि जानकारी गराएको छ ।