रासायनिक मल कारखानाको ‘डीपीआर’ समीक्षा गर्न कार्यदल गठन

News Summary

Generated by OK AI. Editorially reviewed.

लगानी बोर्डले रासायनिक मल कारखानाको डीपीआर समीक्षा गर्न कार्यदल गठन गरेको छ ।
प्रधानमन्त्री केपी शर्मा ओलीको अध्यक्षतामा मंगलबार बसेको बोर्ड बैठकले यस्तो निर्णय गरेको हो ।

१३ जेठ, काठमाडौं । लगानी बोर्डले रासायनिक मल कारखानाको विस्तृत सम्भाव्यता अध्ययन प्रतिवेदन (डीपीआर) समीक्षा गर्न कार्यदल गठन गर्ने निर्णय गरेको छ ।

प्रधानमन्त्री केपी शर्मा ओलीको अध्यक्षतामा मंगलबार बसेको बोर्डको ६३औं बैठकले उक्त निर्णय गरेको बोर्डका सहसचिव प्रद्युम्नप्रसाद उपाध्यायले जानकारी दिए ।

आजको बैठकमा नेपालमा रासायनिक मल कारखाना उत्पादन सम्बन्धमा पेस भएको अन्तिम विस्तृत सम्भाव्यता अध्ययन प्रतिवेदनबारे जानकारी लिइएको उनले बताए ।

प्रतिवेदनको समीक्षा, पुनरावलोकन गरी उपयुक्त विकल्प बोर्डमा सिफारिस गर्न कार्यदल गठन गर्ने निर्णय बैठकले गरेको छ । सरकारले हरेकजसो बजेटमा रासायनिक मल कारखाना स्थापना घोषणा गरे पनि त्यसलाई कार्यान्वयनमा लैजान सकेको छैन ।