तीनकुने घटना : एक सातादेखि थुनछेक बहस जारी

News Summary

Generated by OK AI. Editorially reviewed.

तीनकुने घटनाका प्रतिवादीहरूको थुनछेक बहस काठमाडौं जिल्ला अदालतमा जारी छ।
प्रतिवादीहरूको बयान सकेर २० जेठदेखि बहस सुरु भएको थियो र अन्तिम चरणमा पुगेको बताइएको छ।
सरकारी वकिलहरूले जवाफी बहस गरेपछि आदेश आउनेछ, अहिले ३९ जना प्रतिवादी हिरासतमा छन्।

२८ जेठ, काठमाडौं । तीनकुनेमा भएको राजावादी आन्दोलनका प्रतिवादीहरूको थुनछेक बहस लम्बिएको छ ।

प्रतिवादीहरूको बयान सकेर २० जेठदेखि थुनछेक बहस सुरु भएको थियो । तर आज बुधबार आठ दिन बित्दा समेत थुनछेक बहस जारी छ । प्रतिवादीहरूको तर्फको बहस अन्तिम चरणमा पुगेको बताइएको छ ।

त्यसपछि सरकारी पक्षबाट सरकारी वकिलहरुले जवाफी बहस गर्नेछन् । दुवैतर्फको थुनछेक बहस सकिएपछि बल्ल आदेश आउनेछ ।

तीनकुने घटनामा प्रतिवादीमध्ये अहिले ३९ जना प्रतिवादी हिरासतमा छन् । जिल्ला प्रहरी परिसर काठमाडौंले अनुसन्धान सकेर जिल्ला सरकारी वकिल कार्यालय काठमाडौंमा प्रतिवेदन बुझाएको थियो ।

त्यसपछि सरकारी वकिल कार्यालयले ६१ जनाविरुद्ध काठमाडौं जिल्ला अदालतमा मुद्दा दायर गरेको थियो । चार जना भने नाबालक रहेकाले भक्तपुर पठाइएको थियो ।

उनीहरू ११ जेठमा मुद्दा दायर भएको थियो । त्यसयता निरन्तर काठमाडौं जिल्ला अदालतका न्यायाधीश ध्रुवराज कार्कीको इजलासमा थुनछेक बहस भइरहेको छ ।

११ जनालाई आपराधिक उपद्रवको मात्रै मुद्दा लगाइएको थियो । आपराधिक उपद्रवको मुद्दा खेपेकाहरू भने धरौटी बुझाएर रिहा भइसकेका छन् ।

राजावादी आन्दोलनका कमाण्डर दुर्गा प्रसाईंसहित आठ जनालाई भने कर्तव्य ज्यानको समेत मुद्दा लगाइएको छ ।