वीरगञ्ज मोसो प्रकरण : न्यायाधीशका पीएसओ फेरिए, सुरक्षा बढाइयो

News Summary

Generated by OK AI. Editorially reviewed.

उच्च अदालत जनकपुरको अस्थायी इजलास वीरगञ्जमा न्यायाधीश डा. खुसीप्रसाद थारुलाई मोसो प्रहार गरिएपछि सुरक्षामा कडाई गरिएको छ।
बिहीबार नेकपा बहुमत पार्टीका तीन कार्यकर्ताले न्यायाधीश थारुको कार्यकक्षमा पुगेर मोसो प्रहार गरेका थिए।
सुरक्षा व्यवस्था कडाइ गर्नुका साथै र पीएसओ फेरिएको जिल्ला प्रहरी कार्यालय पर्साका एसपी गौतम मिश्रले जानकारी दिए।

३० जेठ, काठमाडौं । उच्च अदालत जनकपुरको अस्थायी इजलास वीरगञ्जका न्यायाधीश डा. खुसीप्रसाद थारुलाई मोसो प्रहार गरिएपछि न्यायाधीशहरुको सुरक्षामा थप कडाई गरिएको छ ।

बिहीबार न्यायाधीश थारुको कार्यकक्षमै पुगेर नेकपा बहुमत पार्टीका तीन कार्यकर्ताले मोसो प्रहार गरेका थिए । थारुलाई मोसो प्रहार गरेका बेला उनका पीएसओ (पर्सनल सेक्युरेटी अफिसर) विदामा रहेको पाइएको थियो ।

यो घटनापछि भने न्यायाधीशको सुरक्षमा थप कडाई गरिएको जिल्ला प्रहरी कार्यालय पर्साका एसपी गौतम मिश्रले बनाए । ‘पहिलाको भन्दा पाँच सुरक्षाकर्मी पनि खटाइएको उनले बताएका छन् ।

यसका साथै यसअघि खटिँदै आएका न्यायाधीशहरुका पीएसओ पनि फेरिएको छ । न्यायाधीश थारुका साथै सबै न्यायाधीशको पीएसओलाई फिर्ता बोलाएर नयाँ टोली पठाइएको एसपी मिश्रले बताए ।

‘सुरक्षामा कडाई गरेका छौं । पीएसओ पनि परिवर्तन गरेका छौं’, एसपी मिश्रले अनलाइनखबरसँग भने ।

इटा भट्टामा जिउँदै मान्छे पोलेर हत्या गरेको आरोपमा जिल्ला अदालत रौतहटले दोषी ठहर गरेका मोहमद अफताब आलमलाई न्यायाधीश थारुसहितको इजलासले सफाई दिएको थियो ।

त्यसपछि आक्रोशित बहुमत पार्टीका तीन कार्यकर्ताले थारुमाथि मोसो प्रहार गरेका थिए । मोसो प्रहार गरेको आरोपमा प्रहरीले प्यूठानको गौमुखी गाउँपालिका–६ घर भइ हाल ललितपुरको कुपन्डोल बस्दै आएका ३८ वर्षीय अविनाश भन्ने किशोर कुँवर, सर्लाहीको बरहथवा नगरपालिका–२ का ४३ वर्षीय पदम बहादुर मगर र सिराहाको गोलबजार नगरपालिकाका ४८ वर्षीय गर्भु महतोलाई पक्राउ गरेको थियो ।

कुँवर नेकपा बहुमतका केन्द्रीय सदस्य हुन् । त्यस्तै, मगर सर्लाहीका जिल्ला इन्चार्ज र महतो सिराहाका जिल्ला समिति सदस्य रहेका छन् ।