बैंकिङ क्षेत्र सुधार कार्यदलले माग्यो सुझाव

News Summary

Generated by OK AI. Editorially reviewed.

नेपाल राष्ट्र बैंकले बैंकिङ क्षेत्र सुधार सुझाव कार्यदल गठन गरी सुझाव माग गरेको हो।
नीति, सुपरीवेक्षण, ग्राहक सेवा र ग्रामीण कर्जा प्रवाहमा कार्यदलले सुझाव मागेको छ।

४ असार, काठमाडौं । नेपाल राष्ट्र बैंकले गठन गरेको बैंकिङ क्षेत्र सुधार सुझाव कार्यदलले काम सुरु गरेको छ । कार्यदलले पहिलो चरणमा सरोकारवालाबाट सुझाव माग्दै काम थालेको हो ।

कार्यदलले ११ असारसम्म सुझाव पेस गर्न सरोकारवालालाई आग्रह गरेको छ । सुझाव दिँदा बैंकिङ नीति नियमनलाई उदार तर विवेकशील (प्रुडेन्सियल), जोखिममा आधारित प्रभावकारी सुपरीवेक्षण र ग्राहकमैत्री बैंकिङ सेवाको विकास सम्बन्धमा केन्द्रित हुन कार्यदलले अनुरोध गरेको छ ।

त्यस्तै आर्थिक गतिविधि पूर्ण चलायमान बनाउन बैंकिङ क्षेत्रले खेल्नुपर्ने भूमिकाका सम्बन्धमा पनि सुझाव दिन सकिने छ । त्यसैगरी ग्रामीण क्षेत्रमा कर्जा प्रवाह प्रभावकारी बनाउन चाल्नुपर्ने कदमबारे सुझाव दिन सकिने कार्यदलले जनाएको छ ।

बैंक तथा वित्तीय संस्था गाभ्ने र प्राप्ति तथा उक्त कार्यपछिका समस्या पहिचान तथा समाधानका सन्दर्भमा पनि सुझाव दिन सकिन्छ । नेपाललाई ग्रे लिस्टबाट हटाउन बैंकिङ क्षेत्रले खेल्नुपर्ने भूमिका तथा पूँजीबजार विकासमा केन्द्रीय बंैकको समन्वयात्मक भूमिका सम्बन्धमा पनि सुझाव दिन सकिने कार्यदलले जनाएको छ । ।