पोखरा नगर बसको प्रदूषण मापनमा आधा फेल

६ असार, पोखरा । पोखराका नगर बसले अत्यधिक कालो धुँवा फाल्दै उड्ने गर्दा नागरिकले सास्ती खेप्नेदेखि सहरलाई नै प्रदूषित र बद्नाम गराएको भन्दै आवाज उठेपछि शुक्रबार छड्के जाँच भएको छ ।

भौतिक पूर्वाधार तथा यातायात व्यवस्था मन्त्री प्रकाशबहादुर केसीसहित मन्त्रालयका कर्मचारी, यातायात व्यवस्था कार्यालय सवारी कास्की, जिल्ला ट्राफिक प्रहरीले शुक्रबार यस्ता नगर बसको प्रदूषण जाँच गरिएको हो ।

पोखराको न्युरोडमा छड्के गर्दा २१ बसमध्ये १० वटा बसको प्रदूषण जाँचमा फेल भएका छन् । यसअघि १० वटा बसमा जाँच गर्दा ६ वटा फेल भएका थिए ।

मन्त्रालयकै नेतृत्वमा भएको जाँचमा फेल भएका बसका कागजपत्र लिएर ३ दिनभित्र मर्मत गर्नका लागि पठाइएको यातायात व्यवस्था कार्यालय सवारी कास्कीका प्रमुख ढाकाप्रसाद शर्माले जानकारी दिए ।

‘पोखराको न्युरोडमा मन्त्रीकै निर्देशनअनुसार आकस्मिक जाँच गरिएको थियो । जसमा १० वटा गाडीको प्रदूषण फेल भएको छ । ती गाडीलाई तत्काल मर्मत गरेर पास गर्न भनेका छौं, त्यसका लागि ३ दिनको समय दिइएको छ,’ शर्माले भने, ‘एउटै बस पटक पटक जाँच फेल भए भने जरीवाना गर्ने, रुट इजाजतसमेत रद्ध गरिदिनेसम्मको चेतावनी दिइएको छ ।’

यसअघि भएका मेसिन बिग्रिएको र जनशक्तिसमेत नहुँदा प्रदूषण जाँच हुन सकेको थिएन । पछिल्लो पटक गण्डकी प्रदेश सरकारले २ वटा मेसिन ल्याएको छ । यो मेसिन बोकर जुनसुकै ठाउँमा पनि गएर जाँच गर्न सकिने भएकाले सहज पनि हुने कार्यालयको भनाइ थियो ।

पोखराको नगर बसले अत्यधिक धुँवा फालेको भिडियो सामाजिक सञ्चालमा भाइरल भएको थियो । नागरिक तहबाट पनि पोखराका नगर बसले आतंक नै मच्चाएको गुनासे गरेका थिए ।

पोखराका नगर बसले कालो धुँवाको मुस्लो उडाउँदै कुद्दा पोखराकै बद्नाम भएको भन्दै तत्काल अनुगमन र कारबाही गर्न गण्डकी प्रदेश सभाको बैठकमा सांसद हरि भण्डारीले आवाज नै उठाएका थिए ।

चौतर्फी दबाब र आलोचनापछि शुक्रबार चाँज भएको हो । अब आकस्मिक तथा निरन्तर प्रदूषण जाँच गरेर यस्ता बसलाई कारबाहीको दायरामा ल्याउन निर्देशन दिइएको मन्त्री केसीले बताए ।

अहिले पोखरामा डिजेल र पेट्रोलबाट चल्ने दुबै खाले गाडीको प्रदूषण मापन गर्ने २ वटा मेसिन खरिद भएको हो ।

प्रदूषण मापन मेसिनले ३० भन्दा कम देखायो भने पास हुने र त्योमाथि फेल हुने उनको भनाइ छ । पोखरामा कालो धुँवा फाल्ने गाडीको प्रदूषण मापन ‘स्मोक डेनसिटी’ ८०÷९० सम्म देखिएको यातायात कार्यालयले जनाएको छ ।